បរទេស៖ លោក Massimiliano Allegri គ្រូបង្វឹកក្រុម Juventus នឹងមិនហានមើលស្រាលលើក្រុម Villarreal ឡើយ នៅមុនពេលការប្រកួតក្របខ័ណ្ឌ Champions League វគ្គ១៦ក្រុមចុងក្រោយ ជើងទី១ នៅរាត្រីនេះ តាមរយៈការបញ្ជាក់ថា ក្រុមអេស្ប៉ាញមួយនេះ មានជំនាញខាងដណ្តើមយកលទ្ធផលពេលប្រកួតជាមួយនឹងក្រុមខ្លាំងៗនៅអឺរ៉ុប។
លោក Allegri បានដឹកនាំឲ្យក្រុម Juventus ឆ្លងផុតវគ្គ១៦ក្រុមចុងក្រោយនៃក្របខ័ណ្ឌ Champions League ចំនួន៤លើក ក្នុងចំណោមការប្រកួត៥លើក អំឡុងពេលនៃការដឹកនាំលើកដំបូងរបស់លោក ក្នុងនាមជាគ្រូបង្វឹក ខណៈដែលការធ្លាក់ចេញតែ១លើករបស់លោកបានកើតឡើងពេលប្រកួតជាមួយនឹងក្រុម Bayern Munich របស់លោក Pep Guardiola ក្នុងរដូវកាលឆ្នាំ២០១៥-២០១៦។ ប៉ុន្តែ ទោះបីជាយ៉ាងណា ក្រុមសេះបង្កង់ Juventus បានធ្លាក់ចេញត្រឹមវគ្គ១៦ក្រុម ក្នុងរយៈពេល២រដូវកាលចុងក្រោយ ក្រោមការដឹកនាំរបស់លោក Maurizio Sarri និងលោក Andrea Pirlo ខណៈដែលលោក Allegri បានចេញសារតាស់តឿនទាក់ទងនឹងក្រុមដែលបាផ្តួលក្រុម Arsenal និង Manchester United ក្នុងដំណើរឆ្ពោះទៅកាន់ការលើកពាន Europa League កាលពីរដូវកាលមុន។
លោក Allegri បានប្រាប់សន្និសីទសារព័ត៌មានកាលពីថ្ងៃចន្ទថា៖ «វាមិនមែនជាផ្លូវដ៏ងាយស្រួលឡើយក្នុងការទៅវគ្គ៨ក្រុមចុងក្រោយ។ យើងទាំងអស់គ្នាមានឱកាស៥០%ដូចគ្នា ក្នុងការឈានទៅវគ្គបន្ត។ ពួកគេបានឆ្លងផុតពូលដែលមានក្រុមដ៏ខ្លាំងៗដូចយើងដែរ។ ហេតុនេះ ការដណ្តើមបានលទ្ធផលស្មើនៅអេស្ប៉ាញ គឺជាលទ្ធផលដ៏ល្អមួយ»៕
ប្រភពព័ត៌មាន៖ Channel News Asia
