បរទេស៖ លោក Ralf Rangnick បានប្រាប់ក្រុម Manchester United របស់លោក ឲ្យលេងដោយដោយសេរីភាពដូចទៅនឹង Anthony Elanga អ៊ីចឹង ក្រោយពីខ្សែបម្រើស្លាបវ័យ១៩ឆ្នាំរូបនេះ បានឲ្យពួកគេដណ្តើមបានលទ្ធផលស្មើ ១-១ ជាមួយនឹងក្រុម Atletico Madrid កាលពីថ្ងៃពុធ។
Elanga បានចូលលេងក្នុងនាមជាកីឡាករបម្រុងនៅនាទី ទី៧៥ និងបានស៊ុតបាល់បញ្ចូលទីនៅនាទី ទី៨០ ក្រោយពី Atletico បានគ្រប់គ្រងការប្រកួតក្របខ័ណ្ឌ Champions League វគ្គ១៦ក្រុមចុងក្រោយ ជើងទី១ របស់ពួកគេស្ទើរតែទាំងស្រុង នាកីឡដ្ឋាន Wanda Metropolitano។ ប៉ុន្តែ លទ្ធផលស្មើនេះ ហាក់ដូចជាជ័យជម្នះមួយសម្រាប់ក្រុម Man United អ៊ីចឹង ខណៈដែលពួកគេលេងមិនបានល្អសោះក្នុងតង់ទី១ ហើយបច្ចុប្បន្ន ពួកគេកំពុងតែស្ថិតក្នុងទីតាំងដ៏រឹងមាំក្នុងការឈានទៅវគ្គ៨ក្រុមចុងក្រោយ។
លោក Rangnick បានឲ្យដឹងថា៖ «ក្នុងរាល់ការប្រកួតទាំងអស់ដែលរូបគេបានលេង រូបគេបង្ហាញថា រូបគេកំពុងតែលេងជាមួយនឹងការស្រេកឃ្លាន និងភាពរីករាយ។ រូបគេកំពុងតែពេញចិត្តនឹងការលេងរបស់គេនៅលើទីលាន ហើយរូបគេដឹងច្បាស់ពីអាវុធរបស់គេ និងចង់បង្ហាញពីអាវុធនោះ»។ ក្នុងការប្រកួតមួយគូទៀតនៅថ្ងៃដដែលនោះ ក្រុម Ajax ក៏បានបញ្ចប់ក្នុងលទ្ធផលស្មើ ២-២ នៅលើទឹកដីក្រុម Benfica ក្នុងការប្រកួតក្របខ័ណ្ឌ Champions League វគ្គ១៦ក្រុមចុងក្រោយ ជើងទី១ ផងដែរ៕
ប្រភពព័ត៌មាន៖ Channel News Asia