បរទេស៖ ក្លិបកាំភ្លើងធំ Arsenal កាលពីថ្ងៃចន្ទ បានប្រកាសពីការខាតប្រាក់ជាកំណត់ត្រារហូតដល់ទៅ ១០៧,៣លានផោន (ស្មើនឹង១៤៣លានដុល្លារអាមេរិក) សម្រាប់ឆ្នាំសារពើពន្ធ ដែលបិទបញ្ចប់ត្រឹមថ្ងៃទី៣១ ខែឧសភា ឆ្នាំ២០២១។
ក្រោយពីខាតបង់តិចជាង៥០លានផោន នៅក្នុងឆ្នាំ២០២០ ក្លិបស្ថិតក្នុងក្របខ័ណ្ឌ Premier League មួយនេះ បានរងនូវខាតប្រាក់បន្ទាប់ពីកាត់ពន្ធដ៏ច្រើនបំផុតមិនធ្លាប់មានពីមុនមក ក្នុងរបាយការណ៍ហិរញ្ញវត្ថុចុងក្រោយបំផុតរបស់ពួកគេ។ ទឹកប្រាក់ប្រមាណជា៨៥លានផោន ក្នុងចំណោមប្រាក់ដែលខាតនោះ ត្រូវបានគេដាក់ការស្តីបន្ទោសទៅលើការឆ្លងរាតត្បាតនៃវីរុសកូវីដ ១៩ ស្របពេលដែលក្លិប Arsenal បានលេងការប្រកួតតែ២លើកគត់ ពីមុខអ្នកគាំទ្រដែលទស្សនាដោយផ្ទាល់ នាកីឡដ្ឋាន Emirates អំឡុងរដូវកាលឆ្នាំ២០២០-២០២១។
ក្លិប Arsenal បានឲ្យដឹងក្នុងសេចក្តីថ្លែងការណ៍មួយថា៖ «លទ្ធផលនៃឆ្នាំសារពើពន្ធ បានរងនូវផលប៉ះពាល់មួយផ្នែកធំដោយសារតែការឆ្លងរាតត្បាតរបស់វីរុសកូរ៉ូណា ដែលបានធ្វើឲ្យការប្រកួតភាគច្រើនក្នុងរដូវកាលឆ្នាំ២០២០-២០២១ ត្រូវលេងក្នុងកីឡដ្ឋានដែលគ្មានអ្នកទស្សនា»៕
ប្រភពព័ត៌មាន៖ Channel News Asia
