បរទេស៖ លោក Thomas Tuchel បានជំរុញឲ្យអ្នកយកព័ត៌មាន ឈប់សួររូបលោកនូវសំណួរនានា អំពីការឈ្លានពាននៅអ៊ុយក្រែ និងផែនការរបស់លោក Roman Abramovich ក្នុងការប្រគល់សិទ្ធិមើលថែទាំក្លិប Chelsea ទៅឲ្យមូលនិធិមនុស្សធម៌របស់ក្លិបនេះ។
អ្នកចាត់ការទូទៅរបស់ Chelsea រូបនេះ កំពុងតែរៀបចំសន្និទីសារព័ត៌មានមួយ នៅមុនពេលការប្រកួតពាន FA Cup ជាមួយនឹងក្រុម Luton Town នៅរាត្រីនេះ ហើយលោកបានបាត់បង់ការស្ងប់អារម្មណ៍របស់លោក ក្រោយពីត្រូវបានចោទសួរសំណួរដដែលៗជាច្រើនលើកពេក ចំពោះមតិរបស់លោកស្តីពីសង្គ្រាមនៅអ៊ុយក្រែន។ លោក Tuchel ក៏បានរងនូវការចោទសួរជាច្រើនអំពីលោក Abramovich ផងដែរ ក្រោយពីមហាសេដ្ឋីរូបនេះ បានប្រកាសថា លោកនឹងបោះបង់ការមើលថែក្លិប Chelsea បន្ទាប់ពីមានការអំពាវនាវមួយក្នុងរដ្ឋសភាឲ្យលោករងនូវការដាក់ទណ្ឌកម្ម។
គ្រូបង្វឹករូបនេះ ក៏បានផ្ទុះកំហឹងផងដែរ ក្រោយពីត្រូវបានចោទសួរថាតើ លោកសង្ឃឹមថា លោក Abramovich ដែលមានសញ្ជាតិរុស្ស៊ី អាចជួយសម្របសម្រួលស្វែងរកសន្តិភាពរវាងអ៊ុយក្រែន និងរុស្ស៊ី បានឬអត់។ លោក Tuchel បានឲ្យដឹងថា៖ «ស្តាប់ខ្ញុំ ស្តាប់ខ្ញុំ អ្នកត្រូវតែបញ្ឈប់។ ខ្ញុំមិនមែនជាអ្នកនយោបាយឡើយ។ អ្នកត្រូវតែបញ្ឈប់។ ខ្ញុំអាចនិយាយតែម្តងនេះទៀតទេ»៕
ប្រភពព័ត៌មាន៖ The Guardian
