បរទេស៖ លោកមហាសេដ្ឋី Roman Abramovich សញ្ជាតិរុស្ស៊ី ដែលជាម្ចាស់ក្លិប Chelsea បាននិយាយកាលពីថ្ងៃពុធថា លោកបានសម្រេចចិត្ត «ដ៏លំបាកបំផុត» ដើម្បីលក់ក្លិបស្ថិតក្នុងក្របខ័ណ្ឌ Premier League មួយនេះ ដោយសន្យាថា ប្រាក់ដែលបានពីការលក់ទាំងអស់ នឹងត្រូវផ្តល់ឲ្យជនរងគ្រោះដោយសារតែសង្គ្រាមនៅអ៊ុយក្រែន។
មហាសេដ្ឋីរូបនេះ ជឿជាក់ថា វាគឺជាការផ្តល់ «អត្ថប្រយោជន៍ដ៏ធំបំផុត» សម្រាប់ក្រុមម្ចាស់ជើងឯកក្របខ័ណ្ឌ Champions League មួយនេះ ប្រសិនបើលោកចែកផ្លូវជាមួយនឹងក្លិប ដែលលោកបានអភិវឌ្ឍ ចាប់តាំងពីលោបានទិញកាលពីឆ្នាំ២០០៣។ ការសម្រេចចិត្តដ៏រំជួលចិត្តនេះ កើតឡើងត្រឹមតែប៉ុន្មានថ្ងៃប៉ុណ្ណោះ ក្រោយពីលោក Abramovich បាននិយាយថា លោកនឹងប្រគល់សិទ្ធិគ្រប់គ្រងក្លិប Chelsea ទៅឲ្យអ្នកដែលគួរឲ្យទុកចិត្តបំផុតដែលមកពីមូលនិធិសប្បុរសធម៌របស់ក្លិប ក្រោយពីការឈានពានរបស់រុស្ស៊ី លើប្រទេសអ៊ុយក្រែន។ លោក Abramovich បាននិយាយក្នុងសេចក្តីថ្លែងការណ៍មួយថា៖ «ខ្ញុំតែងតែបានធ្វើការសម្រេចចិត្តជាច្រើន ដោយយកអត្ថប្រយោជន៍របស់ក្លិបជាធំ។ ក្នុងស្ថានភាពនាពេលបច្ចុប្បន្ននេះ ខ្ញុំបានធ្វើការសម្រេចចិត្តក្នុងការលក់ក្លិបនេះ ដោយខ្ញុំជឿថា នេះគឺជាការគិតដល់អត្ថប្រយោជន៍ក្លិប អ្នកគាំទ្រ និយោជិត ក៏ដូចជាម្ចាស់ឧបត្ថម្ភ និងដៃគូសហការរបស់ក្លិបជាធំ»។
ក្លិប Chelsea បច្ចុប្បន្នកំពុងជំពាក់បំណុលលោក Abramovich ប្រមាណជា១,៥លានផោន ប៉ុន្តែ លោកនឹងស្នើសុំឲ្យសងកម្ចីនោះឡើយ ស្របពេលដែលលោកក៏នឹងលក់ទ្រព្យសម្បត្តិរបស់លោកក្នុងទីក្រុងឡុងដ៍ផងដែរ។ ក្រោមរជ្ជកាលគ្រប់គ្រងរបស់លោក Abramovich ក្លិប Chelsea បានឈ្នះពានរង្វាន់ធំចំនួន១៩ ក្នុងនោះរាប់បញ្ចូលទាំងពានក្របខ័ណ្ឌ Champions League ២លើក និង Premier League ៥លើកផងដែរ៕
ប្រភពព័ត៌មាន៖ Channel News Asia