ក្រុមជើងឯក៧សម័យកាល ភ្នំពេញក្រោន វិសាខា ព្រះខ័នរាជស្វាយរៀង បឹងកេត ណាហ្គាវើលដ៍ ក្រុមកងយោធពលខេមរភូមិន្ទ (ទ័ព) អង្គរថាយហ្គឺរ និងក្រុមគិរីវង់សុខសែនជ័យ នឹងចាប់ផ្តើមបើកការប្រកួតជាផ្លូវការ នៅលីគកំពូលកម្ពុជា រដូវកាលថ្មី ឆ្នាំ២០២២នេះ ដើម្បីស្វែងរកក្រុមជើងឯក នៅក្នុងការប្រកួតរបត់ថ្មីមួយនេះ។
ក្រោមរបត់រៀបចំការប្រកួតថ្មីរបស់ក្រុមហ៊ុនលីគបាល់ទាត់កម្ពុជា ដោយមានជនជាតិជប៉ុន លោក Satoshi Saito ជានាយកប្រតិបត្តិនោះ គឺការប្រកួតលីគកំពូលកម្ពុជា ឆ្នាំ២០២២នេះ បានផ្លាស់ប្តូរទាំងស្រង់ ទាំងទម្រង់នៃការរៀបចំ រូបមន្តប្រកួត ហើយអ្វីដែលពិសេសនោះ គឺបានកំណត់យកត្រឹម៨ក្រុមប៉ុណ្ណោះ ដោយក្រុមទាំង៨ ត្រូវប្រកួតគ្នាចំនួន៣ជុំ រួចបន្តយកក្រុមកំពូលតារាងទាំង៤ (Top4) ប្រកួត១ជុំទៀត ទើបបូកពិន្ទុសរុប រកក្រុមម្ចាស់ជើងឯក។
សម្រាប់ក្រុមទាំង៨ក្រុម សុទ្ធតែបានអះអាង ពីការត្រៀមខ្លួន យ៉ាងល្អ តាមរយៈការរៀបចំទាំងទម្រង់លេងថ្មី និងការនាំយកកីឡាករល្អៗ ជាពិសេសកីឡាករបរទេស យកមកជួយក្រុម ដោយក្នុងនោះ មានតែក្រុមណាហ្គាវើលដ៍ និងបឹងកេត បានប្រើកីឡាករបរទេសត្រឹម៤នាក់ ខណៈក្រុមចំនួន៦ទៀត បានប្រើកីឡាករបរទេស៥នាក់ ទៅតាមកូតា បានកំណត់ដូចគ្នា ហើយជាមួយគ្នានេះ ក្រុមវិសាខា ណាហ្គាវើលដ៍ អង្គរថាយហ្គឺរ និងគិរីវង់ សុទ្ធតែបានផ្លាស់ប្តូរគ្រូបង្គោលដូចគ្នា។
យ៉ាងណាក៏ដោយ នៅក្នុងបេក្ខភាពក្រុមទាំង៨នេះ ភ្នំពេញក្រោន វិសាខា និងបឹងកេត បានដាក់គោលដៅខ្ពស់ជាងគេ ដោយសុទ្ធតែត្រូវការឈ្នះពានដូចគ្នា ចំណែកក្រុមណាហ្គាវើលដ៍ ស្វាយរៀង ទ័ព អង្គរថាយហ្គឺរ ក៏បានផ្តោតខ្លាំងទៅលើការប្រជែងយកពានផងដែរ ខណៈគិរីវង់ ដែលធ្លាប់ចាញ់ក្រុមទាំង៧ខាងលើនេះ កាលពីរដូវកាល ឆ្នាំ២០២១ ក៏បានប្តេជ្ញាចិត្ត រកឱ្យបានលទ្ធផលល្អប្រសើរផងដែរ។
លោក លី ហៀង អគ្គលេខាធិការក្លិបភ្នំពេញក្រោន បាននិយាយ ក្នុងពេលបង្ហាញឡូហ្គោថ្មី របស់លីគកំពូលកម្ពុជា ថា៖ «ជាទស្សនៈទូទៅ ក្រុមម្ចាស់ជើងឯក តែងតែមានសម្ពាធខ្ពស់ជាងក្រុមផ្សេងៗទៀត ព្រោះយើងជឿថា គ្រប់ក្រុមទាំងអស់ គេចង់ឈ្នះក្រុមជើងឯក។ តែទោះយ៉ាងណា ជាគោលដៅរួមរបស់ក្លិប គឺយើងមិនបានដាក់ សម្រាប់ប្រជែងយកលេខ២ ឬលេខ៣នោះទេ គឺគ្រប់លទ្ធភាពទាំងអស់ យើងដាក់គោលដៅយកជើងឯក ហើយបើយើងមិនបានជើងឯក មានន័យថា យើងបរាជ័យ១ឆ្នាំ»។
ស្រដៀងគ្នានេះ លោក ហុក សុចិត្រា អគ្គលេខាធិការក្លិបបាល់ទាត់វិសាខា បាននិយាយថា៖«សម្រាប់គោលដៅរបស់វិសាខា ដែលបានដាក់ចេញកន្លងមក នៅក្នុងការប្រកួតទាំងអស់ គឺឈ្នះជើងឯង តែបើមិនបានជើងឯក មានន័យថា យើងបរាជ័យ អ៊ីចឹងគោលដៅធំរបស់ក្លិប នៅរដូវកាលនេះ គឺឈ្នះជើងឯក»។
ចំពោះក្រុមបឹងកេត ដែលបានប្រើកីឡាករបរទេសត្រឹម៤នាក់ ជាបណ្តោះអាសន្ននោះ ត្រូវបានលោក បែ មករា ជាអ្នកចាត់ការទូទៅក្រុមនេះ បានបញ្ជាក់ថា៖ «ឆ្នាំ ២០២១ ជារដូវកាលដ៏ខកចិត្តបំផុត សម្រាប់បឹងកេត ដែលមិនធ្លាប់មាន នៅក្នុងប្រវត្តិសាស្ត្ររបស់ក្លិប ដោយបានធ្លាក់ទៅលេខ ៥ ជាលើកដំបូង អ៊ីចឹងដើម្បី ស្តារមុខមាត់ក្លិបឡើងវិញ ក្នុងរដូវកាលថ្មីនេះ ក្លិបបានរៀបចំនូវផែនការយុទ្ធសាស្ត្រមួយចំនួន ព្រោះគោលដៅរបស់យើងត្រូវតែឈ្នះជើងឯក»។
យ៉ាងណាមិញ សម្រាប់ការប្រកួតបើកឆាក នៅថ្ងៃសៅរ៍នេះ ក្រុមបឹងកេត ត្រូវស្វាគមន៍ក្រុមណាហ្គាវើលដ៍ នៅកីឡដ្ឋានខេមបូឌាអ៊ែរវ៉េ នារសៀលម៉ោង ៣:៤៥ ស្របពេល អង្គរថាយហ្គឺរ ត្រូវទទួលក្រុមវិសាខា នៅកីឡដ្ឋានហនុមាន ចំណែកក្រុមភ្នំពេញក្រោន ត្រូវជួបក្រុមម្ចាស់ផ្ទះទ័ព នៅកីឡដ្ឋានស្តាតចាស់ នាល្ងាចម៉ោង ៦:៣០ ហើយក្រុមស្វាយរៀង ត្រូវស្វាគមន៍ក្រុមគិរីវង់ នៅកីឡដ្ឋានខេត្តស្វាយរៀង នាម៉ោង ៦:៣០ ដូចគ្នា៕