«ខ្ញុំបានសម្រេចចិត្ត បញ្ចប់អាជីពជាកីឡាករបាល់ទាត់ នៅពេលនេះហើយ» នេះជាសម្តី ដែលផុសចេញពីមាត់របស់ខ្សែការពារដ៏ល្អ ហុង ផេង នៅពេលរូបគេ បានប្រកាសចូលនិវត្តន៍ជាកីឡាករបាល់ទាត់ កាលពីថ្ងៃសៅរ៍ គឺស្របពេលក្រុមបឹងកេត និងវិសាខា ដណ្តើមបាន៣ពិន្ទុពេញដូចគ្នា នៅក្នុងការប្រកួតបើកឆាកលីគកំពូលកម្ពុជា រដូវកាលថ្មី ឆ្នាំ២០២២ ប៉ុន្តែក្រុមការពារតំណែងជើងឯក ភ្នំពេញក្រោន បានត្រឹម១ពិន្ទុ។
ហុង ផេង ដែលធ្លាប់ពាក់ស្លាកលេខជាប្រធានក្រុម នៅបឹងកេត នោះ ត្រូវបានគេទទួលស្គាល់ថា ជាខ្សែការពារកណ្តាល ដែលមានសមត្ថភាពលេចធ្លោរជាងគេ ទាំងការលេងឱ្យបឹងកេត និងក្រុមជម្រើសជាតិកម្ពុជា ប៉ុន្តែបញ្ហារបួស បានធ្វើឱ្យកីឡាកររូបនេះ បានឃ្លាតឆ្ងាយពីទីលានប្រកួតជាង១ឆ្នាំមកហើយ។
សម្រាប់ការបង្ហាញខ្លួនជាថ្មី នៅកីឡដ្ឋានខេមបូឌាអ៊ែរវ៉េ កាលពីថ្ងៃសៅរ៍ កន្លងមកនេះ វាបានក្លាយជាថ្ងៃចុងក្រោយរបស់ ហុង ផេង ក្នុងការប្រកាសលាអ្នកគាំទ្ររបស់ក្លិបបឹងកេត សម្រាប់អាជីពជាកីឡាករនេះ ហើយគ្រប់គ្នា ហាក់មានការអារម្មណ៍ក្តុកក្តួលផងដែរ ចំពោះការចូលនិវត្តន៍របស់ខ្សែការពារដ៏ល្អមួយនេះ។
យ៉ាងណាក៏ដោយ បន្ទាប់ពីជួបស្ថានភាពសង្វេគចិត្តជាមួយការលាចុងក្រោយរបស់ ហុង ផេង នេះ ក្រុមបឹងកេត បែរជាបង្កើតបាននូវភាពរីករាយវិញ សម្រាប់អ្នកគាំទ្ររបស់ខ្លួន ខណៈពួកគេ បានប្រើទម្រង់លេងយ៉ាងល្អ ដើម្បីយកឈ្នះក្រុមណាហ្គាវើលដ៍ ៣-១ នោះ ដែល៣គ្រាប់នេះ រកបានដោយខ្សែប្រយុទ្ធ ម៉ាត់ នូរុណ នៅនាទីទី២៦ និងទី៦៥ និង សៀង ចន្ធា ១គ្រាប់ នៅនាទីទី៩០ ខណៈ១គ្រាប់របស់ណាហ្គា ជាការស៊ុតបាល់ពិន័យ១១ម៉ែត្របានសម្រេចពីសំណាក់ខ្សែប្រយុទ្ធប្រេស៊ីល Da Cruz នៅនាទីទី១៣។
ស្រដៀងគ្នានេះ ក្រុមវិសាខា បានយកឈ្នះក្រុមម្ចាស់ផ្ទះអង្គរថាយហ្គឺរ ៣-១ ដូចគ្នា។ គ្រាប់បាល់ជ័យជម្នះទាំង៣នេះ ជាការធ្វើបានសម្រេចរួមគ្នារបស់ខ្សែបម្រើប្រយុទ្ធកូរ៉េខាងត្បូង Lee Jaegun នៅនាទីទី៣៨ ច្រឹង ពលរដ្ឋ នៅនាទីទី៤៥ និង កែវ សុខផេង នៅនាទីទី៥៤ ខណៈ១គ្រាប់របស់អង្គរថាយហ្គឺរ រកបានដោយ កីឡាករ ចិន ណារក្ស នៅនាទីទី៤៦។
ជាមួយការជ័យជម្នះនេះ បានជួយឱ្យក្រុមវិសាខា បានឡើងទៅឈរនៅកំពូលតារាង ជាបណ្តោះអាសន្ន លើក្រុមបឹងកេត ដែលឈរនៅលេខ២ ព្រោះការប្រកួតបើកឆាកនេះ ក្រុមការពារតំណែងជើងឯក ភ្នំពេញក្រោន បានត្រឹម ០-០ ជាមួយក្រុមកងយោធពលខេមរភូមិន្ទ (ទ័ព) តែប៉ុណ្ណោះ ខណៈជំនួបរវាងក្រុមព្រះខ័នរាជស្វាយរៀង និងគិរីវង់សុខសែនជ័យ ត្រូវលើកទៅធ្វើនៅថ្ងៃអង្គារស្អែកនេះវិញ។
តាមរយៈការប្រកួតបើកឆាក កាលពីថ្ងៃសៅរ៍នោះដែរ ខ្សែប្រយុទ្ធវ័យក្មេង សៀង ចន្ធា រួមទាំងខ្សែប្រយុទ្ធ កែវ សុខផេង និងអ្នកចាំទី អ៊ុំ វិចិត្រ សុទ្ធតែត្រូវបានជ្រើសរើសជាកីឡាករល្អប្រចាំការប្រកួតដូចគ្នា តាមរយៈការបង្ហាញការលេងយ៉ាងល្អរបស់ពួកគេ ជាពិសេស អ្នកចាំទី អ៊ុំ វិចិត្រ ព្រោះរូបគេ អាចសង្រ្គោះគ្រាប់បាល់ ដែលស៊ុត និងតែតដោយកីឡាករក្រុមភ្នំពេញក្រោន បានជាច្រើនលើក ហើយ អ៊ុំ វិចិត្រ នេះផងដែរ ដែលបានរួមចំណែកជួយឱ្យ ភ្នំពេញក្រោន ឈ្នះពានលីគកំពូល កាលពីឆ្នាំ២០២១៕
