បរទេស៖ លោក Jurgen Klopp បាននិយាយថា ក្រុម Inter Milan នឹងមិនមកប្រកួតលើទឹកដីក្រុម Liverpool នៅសប្តាហ៍នេះក្នុងនាមជាភ្ញៀវទេសចរណ៍ឡើយ បើទោះបីពួកគេកំពុងតែដេញតាមពីក្រោយក្នុងលទ្ធផល ២-០ ក្រោយពីការប្រកួតជើងទី១នៃក្របខ័ណ្ឌ Champions League វគ្គ១៦ក្រុមចុងក្រោយរបស់ពួកគេ ក៏ដោយ។
Liverpool កំពុងតែស្ថិតក្នុងទីតាំងដ៏រឹងមាំក្នុងការឈានទៅវគ្គ៨ក្រុមចុងក្រោយ នៅមុនពេលការប្រកួតជើងទី២នៅរាត្រីនេះ នាកីឡដ្ឋាន Anfield ក្រោយពី Roberto Firmino និង Mohamed Salah បានស៊ុតបាល់បញ្ចូលទីដូចគ្នា លើទឹកដីអ៊ីតាលី កាលពីខែមុន។ ប៉ុន្តែ លោក Klopp នៅតែរក្សាការប្រុងប្រយ័ត្នាជានិច្ច ស្របពេលដែលក្រុមរបស់លោក សម្លឹងរកការរក្សាស្ថិតលើផ្លូវនៃការប្រជែងដណ្តើមពាន៤ដែលមិនធ្លាប់មានពីមុនមក ក្រោយពីបានផ្តួលក្រុម Chelsea ដោយការស៊ុតបាល់ប៉េណាល់ទី ដើម្បីឈ្នះពាន League Cup កាលពីសប្តាហ៍មុន។
ក្នុងសន្និសីទសាសរព័ត៌មាននៅមុនការប្រកួត កាលពីថ្ងៃចន្ទ លោក Klopp បានឲ្យដឹងថា៖ «គ្រប់គ្នាដឹងពីគ្រោះថ្នាក់ហើយអំពីការនាំមុខ ២-០។ ខ្ញុំគិតថា វាជាការនាំមុខដែលអាចត្រូវបានផ្លាស់ប្តូរភាគច្រើន ក្នុងប្រវត្តិសាស្ត្រកីឡាបាល់ទាត់។ ប្រសិនបើអ្នកនាំមុខ ២-០ ក្នុងតង់ទី១ ហើយអ្នកមានក្រុមមួយដែលគិតថា យើងកំពុងតែដើរដល់ពាក់កណ្តាលផ្លូវហើយ នោះយើងប្រាកដជាដើរខុសផ្លូវហើយ។ Inter ជាក្រុមខ្លាំង និងមានបទពិសោធ ហើយពួកគេមិនមកទីនេះជាភ្ញៀវទេសចរណ៍ឡើយ»៕
ប្រភពព័ត៌មាន៖ Channel News Asia