ក្រុមម្ចាស់ផ្ទះ ព្រះខ័នរាជស្វាយរៀង បានចាប់ផ្តើមការប្រកួតបើកឆាករបស់ខ្លួន នៃព្រឹត្តិការណ៍លីគកំពូលកម្ពុជា បានយ៉ាងល្អបំផុត ដោយពួកគេបានយកឈ្នះក្រុមភ្ញៀវ គិរីវង់សុខសែនជ័យ ៣-១ ហើយអ្វីដែលកាន់តែពិសេសនោះ គឺគ្រាប់បាល់ទាំង៣នេះ សុទ្ធតែបានកើតឡើង ដោយការតែតបញ្ចូលទីទាំងអស់។
តាមរយៈការប្រកួត នៅកីឡដ្ឋានខេត្តស្វាយរៀង កាលពីថ្ងៃអង្គារ ម្សិលមិញនេះ ក្រុមម្ចាស់ផ្ទះ មិនបានបង្ហាញភាពស្ទាក់ស្ទើរ ក្នុងការដាក់សម្ពាធទៅលើក្រុមមាន់គោក គិរីវង់ នោះទេ ហើយភាពរីករាយបានកើតមានឡើង យ៉ាងលឿនបំផុត នៅពេល ខ្សែប្រយុទ្ធជនជាតិកាណាដា Marcus Haber បានតែតបាល់បញ្ចូលទី នៅត្រឹមនាទីទី៣នោះ ដែលជាលើកទម្លាក់ឱ្យយ៉ាងល្អរបស់ខ្សែប្រយុទ្ធកាមេរូន Emmauel Mbarga។
បន្ថែមលើភាពរីករាយនេះ ការលើលកបាល់ទម្លាក់មុខទីយ៉ាងល្អរបស់កីឡាករវ័យក្មេង មិត រតនៈ បានផ្តល់ឱកាសឱ្យខ្សែការពារ សារ៉េត គ្រីយ៉ា តែតបញ្ចូលទីបាន១គ្រាប់ទៀត នៅនាទីទី២១ ហើយនៅនាទីទី២៧ Emmauel Mbarga ដដែល ជាអ្នកលើកបាល់ទម្លាក់មុខទី ដើម្បីឱ្យ Marcus តែតបញ្ចូលទី១គ្រាប់ទៀត។
ជាមួយគ្នានេះ ក្រុមស្វាយរៀង ក៏បានបង្កើតឱកាសមាស មួយចំនួនទៀតផងដែរ តែពួកគេ ធ្វើមិនបានសម្រេច។ យ៉ាងណាមិញ សម្រាប់ក្រុមគិរីវង់ បានរង់ចាំរហូតដល់នាទីទី៧៤ ដើម្បីសម្រេចបាន នៅការរកបានគ្រាប់បាល់បើកឆាករបស់ពួកគេ នៅក្នុងការប្រកួតនេះ តាមរយៈការស៊ុតបញ្ចូលទីរបស់ ខ្សែបម្រើស្លាបកូនកាត់ហ្វីលីពីន-ម៉ាឡេស៊ី Porteria Jose Elmer។
តាមរយៈការប្រកួតបើកឆាកនេះ ត្រូវបានគេមើលឃើញថា អតីតខ្សែប្រយុទ្ធជនជាតិកាណាដា Marcus Haber របស់ក្លិបវិសាខា នៅតែអាចរក្សាបាននូវភាពមុតស្រួច ក្នុងការបញ្ចប់ទី ដោយការប្រើក្បាល សម្រាប់ការបង្ហាញខ្លួន ជាលើកដំបូងឱ្យក្រុមព្រះខ័នរាជស្វាយរៀង ហើយ Emmauel Mbarga បានក្លាយជាកីឡាករដ៏សំខាន់ ក្នុងការចាប់ដៃគូលេងជាមួយ Marcus។
ខ្សែប្រយុទ្ធកាមេរូន Emmauel Mbarga ពិតជាបង្ហាញទម្រង់លេងបានយ៉ាងល្អ ទាំងការលេងជាក្រុម និងការលេងជាលក្ខណៈបុគ្គល ហើយរូបគេ ក៏ត្រូវជ្រើសរើសជាកីឡាករល្អ ប្រចាំការប្រកួតនេះផងដែរ ស្របពេលក្រុមស្វាយរៀង បានឈរនៅលេខ២ ដោយមាន៣ពិន្ទុស្មើជាមួយក្រុមលេខ១ វិសាខា និងក្រុមឈរនៅលេខ៣ បឹងកេត ខណៈភ្នំពេញក្រោន និងក្រុមទ័ព មាន១ពិន្ទុដូចគ្នា៕
