បរទេស៖ លោក Pep Guardiola បាននិយាយថា Manchester City ប្រឈមមុខនឹងវិបត្តិខ្វះខ្សែការពារ នៅមុនពេលការប្រកួតជើងទី២នៃក្របខ័ណ្ឌ Champions League វគ្គ១៦ក្រុមចុងក្រោយរបស់ពួកគេជាមួយនឹងក្រុម Sporting Lisbon នៅរាត្រីនេះ ខណៈដែលក្រុមរបស់លោកត្រៀម ការពារគ្រាប់បាល់នាំមុខ ៥-០។
ខ្សែការពារ Kyle Walker កំពុងតែជាប់ពិន័យព្យួរ ខណៈដែលរូបគេត្រូវជាប់ពិន័យ៣ប្រកួត ហើយ Joao Cancelo នៅតែមានជំងឺនៅឡើយ ស្របពេលដែល Nathan Ake និង Ruben Dias នៅតែស្ថិតក្នុងបញ្ជីរបួសនៅឡើយ។ ក្នុងសន្និសីទសារព័ត៌មានមុនការប្រកួត លោក Guardiola បាននិយាយកាលពីថ្ងៃអង្គារថា៖ «យើងនៅសល់កីឡាករ១៤នាក់ដែលអាចចូលលេងបាន។ យើងមានបញ្ហាដោយសារតែការជាប់ពិន័យព្យួររបស់ Kyle ហើយ Joao មានជំងឺ និងមិនអាចលេងបាន។ យើងមានតែខ្សែការពារ៣នាក់ប៉ុណ្ណោះ។ ហេតុនេះ យើងត្រូវតែសម្របខ្លួនជាមួយនឹងក្រុមជម្រើសទី២។ យើងនឹងរង់ចាំមើលពីដំណោះស្រាយដែលយើងនឹងធ្វើ»។
លោក Guardiola ដែលក្រុមរបស់លោកបានរងបរាជ័យក្រោមស្នាដៃក្រុម Chelsea ក្នុងក្របខ័ណ្ឌ Champions League វគ្គផ្តាច់ព្រ័ត្រ កាលពីរដូវកាលមុននោះ បាននិយាយថា ការប្រកួតនេះ មិនទាន់ចប់នៅឡើយទេ បើទោះបី Man City នាំមុខដល់ទៅ៥គ្រាប់ក៏ដោយ៕
ប្រភពព័ត៌មាន៖ Worldsoccertalk
