គ្រូបង្វឹកថ្មីរបស់ក្រុមណាហ្គាវើលដ៍ ឃីម បូរី មានការជឿជាក់ថា កូនក្រុមរបស់ខ្លួន នឹងអាចដណ្តើមបានពិន្ទុត្រឡប់ទៅផ្ទះវិញ នៅពេលពួកគេ ត្រូវប្រកួតលើកទី២ នៃលីគកំពូលកម្ពុជា ឆ្នាំ២០២២នេះ នៅថ្ងៃសៅរ៍នេះ។
ឃីម បូរី ដែលទើបបានបញ្ចប់អាជីពជាកីឡាករ ដើម្បីឡើងមកដឹកនាំក្រុមណាហ្គាវើលដ៍ ក្នុងរដូវកាលនេះ បានដឹងរួចទៅហើយថា វិសាខា គឺជាក្រុមខ្លាំង ដែលសម្បូរទៅដោយធនធានកីឡាករល្អៗ ហើយក្រុមនេះ ក៏ស្ថិតនៅក្រោមការដឹកនាំរបស់លោក Lee Tae Hoon និងលោក មាស ចាន់ណា ដែលជាអតីតគ្រូបង្វឹករបស់គេ ពេលលេងរួមគ្នាជាច្រើនឆ្នាំ នៅណាហ្គាវើលដ៍ ផងដែរ។
អតីតកីឡាករជម្រើសជាតិកម្ពុជា ឃីម បូរី បាននិយាយថា៖ «សម្រាប់ការប្រកួត កាលពីសប្តាហ៍មុន យើងមានបញ្ហាលើផ្នែកកីឡាករ ទាំងទៅលើអ្នកជំងឺកូវីដ១៩ និងបញ្ហាកីឡាករមានរបួស ប៉ុន្តែនៅសប្តាហ៍នេះ កីឡាករទាំងនោះ បានវិលត្រឡប់មកចូលរួមជាមួយក្រុមបានវិញអស់ហើយ នៅឡើយតែកីឡាករម្នាក់ ដែលមិនទាន់ មានភាពរឹងមាំ ពេញលេញវិញ»។
គ្រូបង្វឹកថ្មីថ្មោងរបស់ក្រុមណាហ្គាវើលដ័ ឃីម បូរី បានបន្ថែមថា៖ «យើងដឹងហើយថា វិសាខា ជាក្រុមដែលមានកីឡាករល្អៗច្រើន ប៉ុន្តែខ្ញុំនៅតែមានការជឿជាក់ទៅលើកីឡាកររបស់ខ្ញុំថា ពួកគាត់ នឹងអាចធ្វើបាន សម្រាប់ការប្រកួតលើកនេះ គឺយ៉ាងហោចណាស់ ក៏យើងបាន១ពិន្ទុ នៅលើទឹកដី វិសាខា ផងដែរ»។
គួររំឭកថា សម្រាប់ការប្រកួតបើកឆាក កាលពីថ្ងៃសៅរ៍ សប្តាហ៍មុន ក្រុមវិសាខា បានយកឈ្នះក្រុមម្ចាស់ផ្ទះអង្គរថាយហ្គឺរ ៣-១ នៅលើទឹកដីខេត្តសៀមរាប ប៉ុន្តែណាហ្គាវើលដ៍ បានចាញ់ក្រុមម្ចាស់ផ្ទះ ៣-១ ចំណែកការជួបគ្នារវាងក្រុមទាំង២ នៅកីឡដ្ឋានព្រីនស៍ នាល្ងាចម៉ោង ៦:៣០ ថ្ងៃសៅរ៍នេះ ត្រូវបានគេមើលឃើញថា វិសាខា អាចមានភាពច្រើនជាង ក្នុងការដណ្តើមបាន៣ពិន្ទុ៕
