បរទេស៖ ក្រុម Barcelona បានបន្តបង្ហាញពីភាពខ្លាំងរបស់ខ្លួនក្នុងក្របខ័ណ្ឌ La Liga កាលពីថ្ងៃអាទិត្យ តាមរយៈការលត់ក្រុម Osasuna យ៉ាង់ចាស់ដៃ ខណៈដែល Ferran Torres និង Pierre-Emerick Aubameyang បានស៊ុតបាល់បញ្ចូលទីម្តងទៀត ក្នុងពេលក្រុមខ្លួន ដណ្តើមបានជ័យជម្នះក្នុងលទ្ធផល ៤-០ នាកីឡដ្ឋាន Camp Nou។
គ្រាប់បាល់ស៊ុតបញ្ចូលទី៣គ្រាប់ ក្នុងចន្លោះពេល១៤នាទីក្នុងតង់ទី១ ស្ទើរតែបានកាត់សេចក្តីក្នុងការប្រកួតទាំងមូលទៅហើយ ស្របពេលដែល Torres បានស៊ុតបាល់បញ្ចូលទី២គ្រាប់ ដោយគ្រាប់បាល់ទី១ជាបាល់ប៉េណាល់ទី នៅមុនពេល Aubameyang បានរកគ្រាប់បាល់ទី៣។ បន្ទាប់មក Riqui Puig បានបំពេញជ័យជម្នះសម្រាប់ក្រុមខ្លួន ក្នុងពេលនៅសល់រយៈពេល១៥នាទីចុងក្រោយ។ ការដណ្តើមបានជ័យជម្នះជាលើកទី៤ជាប់ៗគ្នា ជួយឲ្យក្រុម Barcelona ឡើងឈរលេខ៣ នៅលើតារាង ដោយដេញតាមពីក្រោយក្រុម Sevilla ត្រឹមតែ៥ពិន្ទុប៉ុណ្ណោះ និងនៅសល់១ប្រកួតក្នុងតិច ពោលគឺលេងតិចជាងក្រុមរបស់លោក Julen Lopetegui ខណៈដែលការប្រជែងដណ្តើមពានរបស់ Sevilla ទំនងដូចជាបញ្ចប់ទៅហើយ ក្រោយពីពួកគេបានបញ្ចប់ក្នុងលទ្ធផលស្មើ ១-១ ជាមួយនឹងក្រុម Rayo Vallecano។
Sevilla បានទទួលលទ្ធផលស្មើដល់ទៅ៦លើក ក្នុងចំណោមការប្រកួតក្របខ័ណ្ឌលីក៨លើកចុងក្រោយរបស់ពួកគេ ក្នុងក្របខ័ណ្ឌ La Liga ហើយលទ្ធផលស្មើចុងក្រោយរបស់ពួកគេលើទឹកដីក្រុម Vallecano មានន័យថា Real Madrid នឹងនាំមុខ១០ពិន្ទុ លើកំពូលតារាង ប្រសិនបើពួកគេយកឈ្នះលើក្រុម Mallorca នៅរាត្រីនេះ៕
ប្រភពព័ត៌មាន៖ Channel News Asia