បរទេស៖ លោក Ralf Rangnick អ្នកចាត់ការទូទៅរបស់ក្រុម Manchester United កំពុងតែសង្ឃឹមថា Cristiano Ronaldo អាចបង្ហាញពីទម្រង់លេងដ៏ល្អម្តងទៀតដូចកាលពីចុងសប្តាហ៍មុននេះ នៅពេលដែលពួកគេប៉ះជាមួយនឹងក្រុម Atletico Madrid ក្នុងការប្រកួតក្របខ័ណ្ឌ Champions League នៅរាត្រីនេះ។
ខ្សែប្រយុទ្ធអន្តរជាតិព័រទុយហ្គាល់រូបនេះ ទើបតែបានវិលចូលលេងវិញពីរបួសចង្កេះ និងបានរំឭកដល់ទម្រង់លេងដ៏ល្អរបស់គេកាលពីប៉ុន្មានឆ្នាំមុន តាមរយៈការស៊ុតបាល់បញ្ចូលទី៣គ្រាប់ ពេលប្រកួតជាមួយនឹងក្រុម Tottenham Hotspur ក្នុងក្របខ័ណ្ឌ Premier League កាលពីថ្ងៃសៅរ៍ ដើម្បីបន្ថែមលើកំណត់ត្រារបស់គេក្នុងនាមជាអ្នករកបានគ្រាប់បាល់ច្រើនជាងគេគ្រប់ពេលទាំងអស់ ក្នុងកីឡាបាល់ទាត់អាជីព ជាមួយនឹងការរកបាន៨០៧គ្រាប់។ ស្របពេលដែលការប្រកួតវគ្គ១៦ក្រុមចុងក្រោយ លើទឹកដីខ្លួនឯង ជាមួយនឹងក្រុម Atletico ស្ថិតក្នុងលទ្ធផលស្មើ ១-១ បន្ទាប់ពីការប្រកួតជើងទី១ នៅទីក្រុងម៉ាឌ្រីដ លោក Rangnick បាននិយាយថា លោកគ្មានការបារម្ភថា Ronaldo វ័យ៣៧ឆ្នាំ អាចជួបភាពត្រដាបត្រដួសឡើយ ក្រោយពីការបង្ហាញពីភាពមុតស្រួចរបស់គេ ពេលប៉ះក្រុម Spurs។
អ្នកចាត់ការទូទៅបណ្តោះអាសន្នរូបនេះ បានប្រាប់សន្និសីទសារព័ត៌មានកាលពីថ្ងៃចន្ទថា៖ «ទម្រង់លេងជារួមរបស់គេពិតជាល្អ បើទោះបីមិនល្អឥតខ្ចោះក៏ដោយ ហើយនេះគឺជាចំណុចដែលយើងសង្ឃឹមថា នឹងឃើញរូបគេបង្ហាញពីកម្រិតខ្លាំងម្តងទៀតនៅថ្ងៃស្អែកនេះ»។ ខ្ញុំមិនបារម្ភថា រូបគេមិនអាចមានភាពរឹងមាំឡើយ។ រូបគេតែងតែជាមនុស្សដែលចេះមើលថែខ្លួនឯង និងរាងកាយរបស់គេ។ រូបគេដឹងពីអ្វីដែលត្រូវធ្វើ»៕
ប្រភពព័ត៌មាន៖ Channel News Asia
