ក្រុមហ៊ុនលីគបាល់ទាត់កម្ពុជា នៃសហព័ន្ធកីឡាបាល់ទាត់កម្ពុជា និងក្រុមគ្រូបង្វឹកជម្រើសជាតិ បានសម្រេចជារួមថា នឹងមិនមានការប្រមូលផ្ដុំ ក្រុមជម្រើសជាតិកម្ពុជា ក្នុងអំឡុងពេលនៃប្រតិទិនប្រកួតអន្តរជាតិ FIFA (FIFA International Calendar) ក្នុងខែមីនានេះទេ ព្រោះចង់ទុកពេលឱ្យកីឡាករជម្រើសជាតិ បានជួយដល់ក្លិបរបស់ពួកគេ នៅក្នុងការប្រកួតលីគកំពូលកម្ពុជា។
«ក្រុមជម្រើសជាតិកម្ពុជា នឹងមិនមានការប្រមូលផ្ដុំ អំឡុងពេលនៃប្រតិទិនប្រកួតអន្តរជាតិ FIFA ក្នុងខែមីនានេះទេ (FIFA International Calendar) ក្រោយការពិភាក្សារវាង ក្រុមការងារគ្រូនៃក្រុមជម្រើសជាតិ ជាមួយក្រុមហ៊ុនលីគ ក៏បានសម្រេចទុកពេលវេលានេះ ឱ្យក្លិបបន្តការហ្វឹកហាត់ ក៏ដូចជាការប្រកួតរបស់ខ្លួន ក្នុងពានរង្វាន់ជម្រើសជើងឯកខេមបូឌានព្រីមៀរលីគ»។
នេះជាការប្រកាសឱ្យដឹងរបស់សហព័ន្ធកីឡាបាល់ទាត់កម្ពុជា កាលពីព្រឹកថ្ងៃពុធនេះ ហើយជាមួយគ្នានេះ សហព័ន្ធ ក៏បានបង្ហើបពីពេលវេលា ដែលក្រុមជម្រើសជាតិកម្ពុជា ត្រូវធ្វើការប្រមូលផ្តុំ សម្រាប់ត្រៀមការប្រកួតពានរង្វាន់ AFC Asian Cup នៅប្រទេសឥណ្ឌា ផងដែរ ដោយកម្ពុជា ឈរនៅពូលD ជាមួយក្រុមម្ចាស់ផ្ទះឥណ្ឌា ហុងកុង និងក្រុមជម្រើសជាតិអាហ្គានីស្ថាន។
តាមការប្រកួតរបស់សហព័ន្ធកីឡាបាល់ទាត់កម្ពុជាដដែលនេះ បានបញ្ជាក់ថា៖«ក្រុមជម្រើសជាតិកម្ពុជា នឹងផ្ដោតទៅលើការប្រមូលផ្ដុំ នាចុងខែ ឧសភា និងដើមខែ មិថុនា ដើម្បីត្រៀមខ្លួនការប្រកួតវគ្គជម្រុះចុងក្រោយនៃពានរង្វាន់ទ្វីបអាស៊ី AFC Asian Cup នៅប្រទេសឥណ្ឌា»៕