បរទេស៖ អ្នកចាំទី David de Gea របស់ Manchester United បានទទួលស្គាល់ថា «យើងមិនទាន់មានភាពខ្លាំងឡើយ» នៅពេលដែលប្រឈមមុខនឹងការពិតថា ក្រុមហង្សក្រហមរបស់ខ្លួន នឹងបន្តការមិនឈ្នះពានសោះក្នុងរយៈពេល៥ឆ្នាំ។
ការរងបរជ័យយ៉ាងខកចិត្តក្នុងលទ្ធផល ១-០ ក្រោមស្នាដៃក្រុម Atletico Madrid កាលពីថ្ងៃអង្គារ បានធ្វើឲ្យក្រុម Man United ធ្លាក់ចេញពីក្របខ័ណ្ឌ Champions League វគ្គ១៦ក្រុមចុងក្រោយ និងបាត់បង់ឱកាសចុងក្រោយរបស់ខ្លួនក្នុងការឈ្នះពាន ក្នុងរដូវកាលដ៏វេទនាមួយផ្សេងទៀត។ ការបញ្ចេញប្រតិកម្មក្នុងពេលបញ្ចប់ការប្រកួតនាកីឡដ្ឋាន Old Trafford មានភាពផ្ទុយគ្នាស្រឡះ ខណៈដែលលោក Diego Simeone គ្រូបង្វឹកក្រុម Atletico បានសម្តែងនូវការអបអរយ៉ាងខ្លាំង។
ក្រុម Atletico បានការពារយ៉ាងរឹងមាំ ក្រោយពីកីឡាករ Renan Lodi បានបំពេញការវាយសម្រុករហ័ស ដើម្បីរកគ្រាប់បាល់បញ្ចូលទីនៅជិតបញ្ចប់ការប្រកួតក្នុងតង់ទី១ ដែលជាគ្រាប់បាល់កាត់សេចក្តីក្នុងការប្រកួតតែម្តង។ លោក Rangnick បាននិយាយថា៖ «យើងបានដឹងយ៉ាងច្បាស់ពីករណីបែបនេះក្នុងពេលប្រកួតជាមួយនឹងក្រុមដែលអ្នកត្រូវតែរកគ្រាប់បាល់បញ្ចូលទីឲ្យបានមុន»។ ស្របពេលជាមួយគ្នានេះ Darwin Nunez បានតែតបាល់បញ្ចូលទីនៅនាទី ទី៧៧ ខណៈដែល Benfica បានទម្លាក់ក្រុម Ajax ដើម្បីឈានទៅវគ្គ៨ក្រុមចុងក្រោយ កាលពីថ្ងៃអង្គារ ក្រោយពីបានឈ្នះក្នុងការប្រកួតជើងទី២ ក្នុងលទ្ធផល ១-០ នៅ Amsterdam ដើម្បីឈ្នះទាំង២ជើង ៣-២៕
ប្រភពព័ត៌មាន៖ Channel News Asia
