បរទេស៖ នៅមុនពេលការប្រកួតក្របខ័ណ្ឌ Champions League នៅរាត្រីនេះ លោក Jocelyn Gourvennec គ្រូបង្វឹកនៃក្រុម Lille បាននិយាយកាលពីថ្ងៃអង្គារថា ការដាក់បម្រាមនានាលើក្លិប Chelsea និងទណ្ឌកម្មនានាលើម្ចាស់ក្លិបរបស់ពួកគេ ហាក់មិនផ្តល់ផលប៉ះពាល់ដល់ទម្រង់លេងរបស់ក្រុមនេះ នៅលើទីលានប្រកួតឡើយ ខណៈដែលពួកគេឈ្នះការប្រកួតជាធម្មតា។
Chelsea កំពុងតែប្រើប្រាស់អាជ្ញាបណ្ណពិសេស ពីរដ្ឋាភិបាលចក្រភពអង់គ្លេស ដែលបានកំណត់ការចំណាយរបស់ពួកគេ និងបានផ្តល់ផលប៉ះពាល់ដល់ប្រតិបត្តិការនានា បន្ទាប់ពីការដាក់ទណ្ឌកម្មលើម្ចាស់ក្លិបជាមហាសេដ្ឋីរុស្ស៊ីរបស់ពួកគេគឺលោក Roman Abramovich។ Lille នឹងធ្វើជាម្ចាស់ផ្ទះទទួលក្រុម Chelsea ក្នុងការប្រកួតក្របខ័ណ្ឌ Champions League វគ្គ១៦ក្រុមចុងក្រោយ ជើងទី២ នៅរាត្រីនេះ ស្របពេលដែលក្រុមរបស់បារាំងមួយនេះ សម្លឹងរកការស្រោចស្រង់ពីការចាញ់ក្នុងលទ្ធផល ២-០ ពីការប្រកួតជើងទី១ នាកីឡដ្ឋាន Stamford Bridge កាលពីខែមុន។
លោក Gourvennec បានប្រាប់សន្និសីទសារព័ត៌មានថា៖ «ចាប់តាំងពី មានបញ្ហាទាំងនេះ ប្រហែលជា៣សប្តាហ៍មុន ពួកគេបន្តឈ្នះការប្រកួតរបស់ពួកគេ។ នៅអង់គ្លេស ពួកគេនៅតែខ្លាំង។ សូម្បីតែប្រកួតនៅថ្ងៃអាទិត្យជាមួយនឹងក្រុម Newcastle ពួកគេបានស៊ុតបាល់បញ្ចូលទីនៅនាទី ទី៩០ ឬ៩១ ដើម្បីឈ្នះការប្រកួត។ ហេតុនេះ វាហាក់បង្ហាញថា ពួកគេមិនមានផលប៉ះពាល់ពីបញ្ហានោះឡើយ»៕
ប្រភពព័ត៌មាន៖ Channel News Asia
