បរទេស៖ លោក Thomas Tuchel គ្រូបង្វឹកក្រុម Chelsea បានកោតសរសើរកីឡាកររបស់លោកចំពោះការនៅតែរក្សាការផ្តោតអារម្មណ៍ ក្នុងពេលដែលមានភាពមិនច្បាស់ជុំវិញអនាគតរបស់ក្លិប ក្រោយពីពួកគេ កាលពីថ្ងៃពុធ បានឈានទៅប្រកួតក្របខ័ណ្ឌ Champions League វគ្គ៨ក្រុមចុងក្រោយ ខណៈដែលលោកគិតថា គ្មានក្រុមណាចង់ជួបក្រុមរបស់លោកក្នុងវគ្គ១/៤ផ្តាច់ព្រ័ត្រនេះឡើយ។
ក្រុមម្ចាស់ការពារតំណែងជើងឯកមួយនេះ បានវាយបកតាមពីក្រោយ ដើម្បីផ្តួលក្រុម Lille ក្នុងលទ្ធផល ២-១ នៅភាគខាងជើង ប្រទេសបារាំង និងឈ្នះការប្រកួតទាំង២ជើងក្នុងលទ្ធផល ៤-១ ស្របពេលដែល Christian Pulisic និងប្រធានក្រុម Cesar Azpilicueta គឺជាអ្នករកបានគ្រាប់បាល់ទាំង២គ្រាប់សម្រាប់ក្រុមខ្លួន។
ជ័យជម្នះនេះ បានកើតឡើង នៅថ្ងៃតែមួយ ដែលមានព័ត៌មានលេចឮថា គ្រួសារត្រកូល Ricketts ដែលជាម្ចាស់ក្លិប Chicago Cubs ក្នុងក្របខ័ណ្ឌបេស្បល Major League Baseball គឺជាបេក្ខភាពឈានមុខគេដែលទិញក្លិបនេះ ស្របពេលដែលអតីតតារាអត្តពលអង់គ្លេស Sebastian Coe ក៏បានប្រកាសពីការចូលរួមទិញក្លិបតោខៀវផងដែរ។ នៅពេលផ្តល់សម្ភាសជាមួយនឹងអ្នកសារព័ត៌មាននាកីឡដ្ឋាន Stade Pierre-Mauroy លោក Tuchel បានឲ្យដឹងថា៖ «សូមអរគុណសម្រាប់ការបង្កើតភាពរីករាយដល់ខ្ញុំ។ ថ្ងៃនេះ ខ្ញុំពិតរីករាយដែលយើងស្ថិតក្នុងវគ្គ៨ក្រុមចុងក្រោយ»៕
ប្រភពព័ត៌មាន៖ Channel News Asia
