បរទេស៖ ក្រុម Villarreal បានឈានទៅវគ្គ៨ក្រុមចុងក្រោយនៃក្របខ័ណ្ឌ Champions League កាលពីថ្ងៃពុធ ក្រោយពីបានផ្តួលក្រុម Juventus ក្នុងលទ្ធផល ៣-០ ក្នុងទីក្រុង Turin ដើម្បីឈានទៅវគ្គបន្តក្នុងលទ្ធផលទាំង២ជើង ៤-១។
គ្រាប់បាល់ប៉េណាល់ទីពីសំណាក់កីឡាករ Gerard Moreno និង Arnaut Danjuma និងគ្រាប់បាល់ស៊ុតបញ្ចូលទីយ៉ាងល្អរបស់ Pau Torres នៅរយៈពេល១៥នាទីចុងក្រោយ គ្រប់គ្រាន់សម្រាប់ក្រុមរបស់លោក Unai Emery ក្នុងការទម្លាក់ក្រុមអ៊ីតាលី នាកីឡដ្ឋាន Allianz និងឈានទៅវគ្គ៨ក្រុមចុងក្រោយ។
Villarreal បានធ្វើឲ្យក្រុម Juventus មានភាពស្រឡាំងកាំង ជាមួយនឹងគ្រាប់បាល់បញ្ចូលទី៣គ្រាប់បន្តបន្ទាប់គ្នា ក្រោយពីបានលេងដោយផ្តោតតែលើតំបន់ការពារក្នុងការប្រកួតនេះ ក្នុងគោលបំណងរារាំងការវាយសម្រុកក្រុមម្ចាស់ផ្ទះ និងធ្វើការវាយបករហ័ស។ ការរងបរាជ័យដ៏អាម៉ាសនេះ គឺជាការចាញ់ជាលើកទី២របស់ Juventus បើគិតចាប់តាំងពីចុងខែវិច្ឆិកា និងបង្កើតឲ្យមានភាពអវិជ្ជមានក្នុងពេលដែលពួកគេកំពុងមានទម្រង់លេងយ៉ាងល្អក្នុងការប្រកួតក្របខ័ណ្ឌលីក៕
ប្រភពព័ត៌មាន៖ Channel News Asia