បរទេស៖ លោក Xavi Hernandez បានបញ្ជាក់ថា ការយកឈ្នះក្នុងលទ្ធផល ៤-០ របស់ក្រុម Barcelona លើក្រុម Real Madrid អាចនឹងក្លាយជាចំណុចផ្លាស់ប្តូរសម្រាប់ក្លិបនេះ ក្រោយពីការដណ្តើមបានជ័យជម្នះដ៏រំភើបក្នុងការប្រកួត Clasico របស់ពួកគេ នាកីឡដ្ឋាន Santiago Bernabeu កាលពីថ្ងៃអាទិត្យ។
ក្រុម Barcelona បានលត់ក្រុម Real Madrid យ៉ាងចាស់ដៃ ខណៈដែលខ្សែប្រយុទ្ធ Pierre-Emerick Aubameyang បានស៊ុតបាល់បញ្ចូលទី២គ្រាប់ ពោលគឺនៅចន្លោះគ្រាប់បាល់របស់ Ronald Araujo និង Ferran Torres។ ការប្រកួតនេះ ត្រូវបានចាត់ទុកថា ជាការតេស្តលើវឌ្ឍនភាពរបស់ក្រុម Barcelona ក្រោមការដឹកនាំរបស់លោក Xavi ហើយពួកគេបានឆ្លងផុតជាមួយនឹងជ័យជម្នះយ៉ាងកក់ក្តៅលើគូប្រកួតដ៏ខ្លាំងបំផុតរបស់ពួកគេ ខណៈដែលជ័យជម្នះនេះ បានបង្ហាញថា ពួកគេត្រៀមខ្លួនរួចរាល់ហើយសម្រាប់ការប្រជែងដណ្តើមពានក្របខ័ណ្ឌ La Liga ម្តងទៀត នៅរដូវកាលក្រោយ។ លោក Xavi បានឲ្យដឹងថា៖ «វាអាចផ្លាស់ប្តូរកម្លាំងនាពេលបច្ចុប្បន្ន និងថ្ងៃអនាគត។
យើងមានឱកាសជាច្រើន ហើយយើងធ្វើបានល្អប្រសើរជាងក្រុម Real Madrid ដាច់។ យើងសមតែរកបានគ្រាប់បាល់ច្រើនជាងនេះ»។ នៅពេលដែលត្រូវបានចោទសួរថា Barcelona វិលត្រឡប់មកវិញហើយ? លោក Xavi បានឆ្លើយថា៖ «វាប្រហែលជាចឹងឯង។ នេះគឺជាផ្លូវដ៏ត្រឹមត្រូវ»៕
ប្រភពព័ត៌មាន៖ Channel News Asia
