បរទេស៖ ក្លិប Manchester City បានឡើងឈរលើកំពូលតារាងនៃលីកវិភាគសាច់ប្រាក់ក្នុងកីឡាបាល់ទាត់ Deloitte ជាលើកដំបូង ក្នុងនាមជាក្លិបដែលរកបានចំណូលខ្ពស់ជាងគេបំផុតក្នុងរដូវកាលឆ្នាំ២០២០-២០២១ ដែលត្រូវបានរងនូវផលប៉ះពាល់ដោយសារតែការរាតត្បាតនៃវីរុសកូវីដ ១៩។
ក្លិប Barcelona ដែលឈរលេខ១កាលពីមុន បានធ្លាក់ទៅឈរក្នុងចំណាត់ថ្នាក់លេខ៤ ក្នុងរដូវកាលទី២៥នៃការបង្កើតតារាងនេះ ដែលជាចំណាត់ថ្នាក់ដ៏ទាបបំផុតរបស់ក្លិបអេស្ប៉ាញមួយនេះបើគិតចាប់តាំងពីឆ្នាំ២០១៣-២០១៤។ ក្លិប Man City ដែលមានម្ចាស់កម្មសិទ្ធិមកពីអាប៊ូដាប៊ី និងរកបានចំណូលសរុប៦៤៤,៩លានអឺរ៉ូ (ស្មើនឹង៧១០,៨១លានដុល្លារអាមេរិក) ក៏ដូចជាមានម្ចាស់ឧបត្ថម្ភជាច្រើននៅក្រោយ បានឡើងរហូតដល់ទៅ៦ចំណាត់ថ្នាក់។ ក្រុមម្ចាស់ជើងឯកក្របខ័ណ្ឌ Premier League មួយនេះ និងកំពុងតែនាំមុខលើតារាងនាពេលបច្ចុប្បន្ន គឺជាក្លិបទី៤ដែលឡើងឈរលើតារាង Deloitte បន្ទាប់ពីក្លិប Barcelona, Real Madrid និង Manchester United។ ក្លិប Real Madrid (រកបានចំណូល៦៤០,៧លានអឺរ៉ូ) ស្ថិតក្នុងចំណាត់ថ្នាក់លេខ២ ហើយក្លិប Bayern Munich (រកបានចំណូល៦១១,៤លានអឺរ៉ូ) ស្ថិតក្នុងចំណាត់ថ្នាក់លេខ៣។
ក្លិប Manchester United ស្ថិតក្នុងចំណាត់ថ្នាក់លេខ៥ ដែលជាចំណាត់ថ្នាក់ដ៏ទាប់បំផុតរបស់ពួកគេមកទល់ពេលនេះ ស្របពេលក្លិប Paris St Germain ស្ថិតក្នុងចំណាត់ថ្នាក់លេខ៦ ហើយក្លិប Liverpool ស្ថិតក្នុងចំណាត់ថ្នាក់លេខ៧។ ក្រុមម្ចាស់ជើងឯកទ្វីបអឺរ៉ុប Chelsea ដែលបច្ចុប្បន្ន កំពុងតែដាក់លក់ដោយសារតែការដាក់ទណ្ឌកម្មនានា លើម្ចាស់កម្មសិទ្ធិជាសេដ្ឋីរុស្ស៊ី លោក Roman Abramovich ក្រោយពីការឈ្លានពាននៅអ៊ុយក្រែន បានស្ថិតក្នុងចំណាត់ថ្នាក់លេខ៨៕
ប្រភពព័ត៌មាន៖ Channel News Asia
