បរទេស៖ ខ្សែបម្រើប្រយុទ្ធ Christian Eriksen បាននិយាយថា គ្រាប់បាល់ស៊ុតបញ្ចូលទីរបស់គេ នៅថ្ងៃដែលរូបគេវិលទៅលេងឲ្យក្រុមបាល់ទាត់ជម្រើសជាតិដាណឺម៉ាកវិញ គឺគ្រាន់តែ «ជាការកម្តៅសាច់ដុំ» ប៉ុណ្ណោះ សម្រាប់ការប្រកួតលើទីលានដូចគ្នាក្នុងទីក្រុង Copenhagen ដែលជាកន្លែងរូបគេបានជួបបញ្ហាគាំងបេះដូង កាលពីឆ្នាំមុន។
ការបង្ហាញខ្លួនរបស់ Eriksen ក្នុងនាមជាកីឡាករបម្រុងនៅតង់ទី២ ក្នុងពេលក្រុមខ្លួនចាញ់ក្នុងលទ្ធផល ៤-២ ក្រោមស្នាដៃក្រុមជម្រើសជាតិហូឡង់ ក្នុងទីក្រុង Amsterdam កាលពីថ្ងៃសៅរ៍ ត្រូវបានសាទរយ៉ាងខ្លាំងក្លា ក្នុងនោះរាប់បញ្ចូលទាំងគ្រូបង្វឹកនៃក្រុមជម្រើសជាតិហូឡង់ លោក Louis van Gaal ផងដែរ។ រយៈពេល២នាទីក្រោយមក បន្ទាប់ពីចូលលេង កីឡាករវ័យ៣០ឆ្នាំរូបនេះ រកបានគ្រាប់បាល់ទី២របស់ក្រុមជម្រើសជាតិដាណឺម៉ាក ក្នុងការប្រកួតនោះ ជាមួយនឹងការស៊ុតបាល់បញ្ចូលទីជាមួយនឹងការប្រើកម្លាំងជើងយ៉ាងខ្លាំង។
Eriksen បាននិយាយថា គ្រាប់បាល់នោះគឺជាកាដូយ៉ាងល្អឥតខ្ចោះដើម្បីអបអរការវិលទៅលេងវិញរបស់គេ ហើយរូបគេកំពុងតែសម្លឹងឆ្ពោះទៅកាន់ការវិលទៅកាន់កីឡដ្ឋាន Parken ក្នុងរដ្ឋធានីដាណឺម៉ាក ដើម្បីប៉ះជាមួយនឹងក្រុមជម្រើសជាតិស៊ែប៊ី ក្នុងការប្រកួតមិត្តភាពនៅថ្ងៃអង្គារ។ រូបគេបានប្រាប់ស្ថានីយទូរទស្សន៍ដាណឺម៉ាក Kanal 5 កាលពីថ្ងៃសៅរ៍ថា៖ «ការប្រកួតនៅថ្ងៃខាងមុខនេះ នឹងកាន់តែពិសេសជាងមុន។ ថ្ងៃនេះ គឺជាការកម្តៅសាច់ដុំយ៉ាងល្អសម្រាប់ថ្ងៃអង្គារ ដែលនៅពេលនោះ ខ្ញុំនឹងរត់នៅលើទីលានដែលហេតុការណ៍នោះបានកើតឡើង»៕
CHRISTIAN ERIKSEN SCORES TWO MINUTES INTO HIS RETURN TO INTERNATIONAL FOOTBALL!!! pic.twitter.com/BztWOVLGqM
— ESPN FC (@ESPNFC) March 26, 2022
ប្រភពព័ត៌មាន៖ Channel News Asia