បរទេស៖ ខែប្រយុទ្ធ Cristiano Ronaldo បានចាត់ទុកថា ការប្រកួត World Cup វគ្គ Playoff របស់ក្រុមបាល់ទាត់ជម្រើសជាតិព័រទុយហ្គាល់ ជាមួយនឹងក្រុមជម្រើសជាតិម៉ាសេដ្វានខាងជើង នៅរាត្រីនេះ «គឺជាការប្រកួតស្លាប់ និងរស់»។
តារាឆ្នើម Ronaldo របស់ក្លិប Manchester United កំពុងតែសង្ឃឹមថា អាចឈ្នះសិទ្ធិទៅប្រកួត World Cup ជាលើកទី៥ ជាមួយនឹងក្រុមជម្រើសជាតិព័រទុយហ្គាល់ និងទទួលបានឱកាសមួយផ្សេងទៀតក្នុងការលើកពាននេះ ជាលើកដំបូង ក្នុងវ័យ៣៧ឆ្នាំ។ ក្រុមឈ្នះពីការប្រកួតនៅទីក្រុង Porto នឹងឈ្នះកៅអីទៅលេងក្នុងព្រឹត្តិការណ៍ World Cup នៅឆ្នាំនេះ ក្នុងប្រទេសកាតា។ Ronaldo បានប្រាប់សន្និសីទសារព័ត៌មានកាលពីថ្ងៃចន្ទថា៖ «ក្រុមនេះ កំពុងតែស្ថិតក្នុងការជឿជាក់។ ខ្ញុំមានអារម្មណ៍ថា កីឡាករទាំងអស់ត្រៀមខ្លួនរួចរាល់ហើយ។ សម្រាប់យើង ការប្រកួតនេះគឺជាការប្រកួតស្លាប់-រស់។
យើងដឹងយ៉ាងច្បាស់ពីសារសំខាន់នៃការប្រកួត ហើយខ្ញុំសូមយកឱកាសនេះ ដើម្បីអំពាវនាវឲ្យអ្នកគាំទ្រផ្តល់ការគាំទ្រដល់យើងយ៉ាងកក់ក្តៅនៅថ្ងៃស្អែកនេះ»។ ក្រុមជម្រើសជាតិព័រទុយហ្គាល់ ដែលបានទម្លាក់ក្រុមតួកគី ៣-១ ក្នុងវគ្គ Playoff ពាក់កណ្តាលផ្តាច់ព្រ័ត្រ ទំនងជាបានរំពឹងទុកថា នឹងត្រូវប៉ះអុីតាលី ក្នុងវគ្គ playoff ផ្តាច់ព្រ័ត្រ ប៉ុន្តែ ក្រុមម្ចាស់ជើងឯកអឺរ៉ុបមួយនេះ បែរចាញ់ដ៏មិននឹកស្មានដល់ក្នុងលទ្ធផល ១-០ លើទឹកដីខ្លួនឯង ក្រោមស្នាដៃក្រុមជម្រើសជាតិម៉ាសេដ្វានខាងជើង កាលពីសប្តាហ៍មុនទៅវិញ៕
ប្រភពព័ត៌មាន៖ Channel News Asia