បរទេស៖ លោក Diego Simeone បានទទួលស្គាល់កាលពីថ្ងៃចន្ទថា ក្រុម Manchester City មាន «កីឡាករឆ្នើមៗ» ជាងក្រុម Atletico Madrid ប៉ុន្តែ ភាពជោគជ័យរបស់ក្រុម Chelsea ក្នុងក្របខ័ណ្ឌ Champions League កាលពីឆ្នាំមុន បង្ហាញថា ក្រុមរបស់លោកនៅតែអាចឈានទៅវគ្គពាក់កណ្តាលផ្តាច់ព្រ័ត្រ។
Atletico ត្រូវបានគេចាត់ទុកថា ជាក្រុមមានក្តីសង្ឃឹមតិចតួច មុនឈានទៅកាន់ការប្រកួតជើងទី១នៅទីក្រុង Manchester United នៅរាត្រីនេះ ប៉ុន្តែ ក្រុមរបស់លោក Simeone ធ្លាប់មានប្រវត្តិជាច្រើនក្នុងការបង្កើតភាពភ្ញាក់ផ្អើលនានា ដោយពួកគេក៏ធ្លាប់បានផ្តួលក្រុម Bayern Munich របស់លោក Pep Guardiola ក្នុងឆ្នាំ២០១៦ ផងដែរ។ លោក Simeone បាននិយាយក្នុងសន្និសីទសារព័ត៌មានថា៖ «ខ្ញុំគ្មានការសង្ស័យឡើយដែលក្រុម Manchester City មានកីឡាករឆ្នើមៗច្រើន។ ពួកគេមានកីឡាករល្អៗជាងយើង ប៉ុន្តែ យើងមានការប្រកួត២ជើងដើម្បីលេង។ ក្រុម Manchester City និង Bayern គឺជាក្រុមមានក្តីសង្ឃឹមខ្ពស់ ដោយសារតែកីឡាករដែលពួកគេមាន ប៉ុន្តែ កាលពីរដូវកាលមុន Chelsea បានឈ្នះពាន។ ពួកគេលេងបានល្អជាងក្រុមនានា ពួកគេបានលេងក្នុងនាមជាក្រុមមួយ ហើយពួកគេបានទទួលជ័យជម្នះ ដែលគ្មាននរណាម្នាក់ បានរំពឹងទុក»។
ជាមួយគ្នានេះ លោក Guardiola បានបដិសេធក្នុងការផ្តោតលើការពិភាក្សាទាក់ទងនឹងបច្ចេកទេសប្រកួត ស្របពេលដែលមានការលើកឡើងថា វានឹងក្លាយការប្រកួតរវាងក្រុមដែលផ្តោតលើការគ្រប់គ្រងបាល់ឲ្យបានច្រើនរបស់លោក Pep និងការលេងបែបវាយសម្រុករហ័សរបស់ក្រុម Atletico ក្រោមការដឹកនាំរបស់លោក Simeone៕
ប្រភពព័ត៌មាន៖ worldsoccertalk
