បរទេស៖ Liverpool បានគ្រប់គ្រងការប្រកួតក្របខ័ណ្ឌ Champions League វគ្គ៨ក្រុមចុងក្រោយរបស់ពួកគេបានយ៉ាងល្អពេលប៉ះក្រុម Benfica កាលពីថ្ងៃអង្គារ ខណៈដែល Sadio Mane, Ibrahima Konate និង Luis Diaz បានជួយឲ្យក្រុមហង្សក្រហមមួយនេះ នាំមុខក្នុងលទ្ធផល ៣-១ ក្រោយពីការប្រកួតជើងទី១នៅទីក្រុង Lisbon។
Konate បានតែតបាល់បញ្ចូលទីយ៉ាងល្អដើម្បីរកគ្រាប់បាល់ជាលើកដំបូងរបស់ខ្លួនសម្រាប់ Liverpool ក្រោយពីការទាត់បាល់ចេញពីជ្រុងម្ខាង នៅមុនពេល Mane បានស៊ុតបាល់បំប៉ោងសំណាញ់ទី ដើម្បីបន្ថែមការនាំមុខរបស់ក្រុមខ្លួន នាកីឡដ្ឋាន Estadio da Luz។ ក្រុម Benfica បានវាយបក១គ្រាប់វិញនៅដើមតង់ទី២ នៅពេលដែលការប្រព្រឹត្តកំហុសរបស់ Konate បានអនុញ្ញាតឲ្យកីឡាករ Darwin Nunez ស៊ុតបាល់បញ្ចូលទីយ៉ាងល្អ ប៉ុន្តែ Luis Diaz ដែលបានបង្ហាញពីទម្រង់លេងយ៉ាងល្អ បានបន្ថែមគ្រាប់បាល់ទី៣ ដើម្បីធ្វើឲ្យ Liverpool សម្លឹងឆ្ពោះទៅកាន់វគ្គពាក់កណ្តាលផ្តាច់ព្រ័ត្រ។
Liverpool នឹងមានការជឿជាក់ក្នុងការបំពេញជ័យជម្នះរបស់ខ្លួននៅកីឡដ្ឋាន Anfield នាសប្តាហ៍ក្រោយ ស្របពេលដែលលោក Jurgen Klopp ទំនងដូចជាមានភាពកក់ក្តៅក្នុងការប្តូរ Mohamed Salah, Mane និង Thiago Alcantara ចេញ ក្រោយពីលេងបាន១ម៉ោង។ Salah ប្រាកដជាត្រូវរក្សាទុកសម្រាប់ថ្ងៃអាទិត្យ ដែលនៅពេលនោះ Liverpool នឹងត្រូវប៉ះជាមួយក្រុម Manchester City ក្នុងការប្រកួតមួយដែលអាចជាការប្រកួតកាត់សេចក្តីក្នុងការប្រជែងពាន Premier League៕
ប្រភពព័ត៌មាន៖ Channel News Asia
