បរទេស៖ ខ្សែបម្រើប្រយុទ្ធដ៏មានឥទ្ធិពល Kevin De Bruyne បានបំបែកតំបន់ការពារដ៏រឹងមាំរបស់ក្រុម Atletico Madrid ខណៈដែលគ្រាប់បាល់ស៊ុតបញ្ចូលទីយ៉ាងល្អរបស់តារាឆ្នើមនៃក្រុម Manchester City រូបនេះ បានជួយឲ្យក្រុមខ្លួនទទួលជ័យជម្នះក្នុងលទ្ធផល ១-០ ក្នុងការប្រកួតក្របខ័ណ្ឌ Champions League វគ្គ៨ក្រុមចុងក្រោយ ជើងទី១ កាលពីថ្ងៃអង្គារ។
ក្រុមរបស់លោក Pep Guardiola ទំនងដូចជាជួបការលំបាកក្នុងការព្យាយាមស្វែងរកវិធីដើម្បីទម្លុះតំបន់ការពារដ៏រឹងមាំរបស់ក្រុម Atletico នាកីឡដ្ឋាន Etihad។ ប៉ុន្តែ លោក Guardiola បានដាក់ឲ្យ Phil Foden ចូលលេងនៅពាក់កណ្តាលតង់ទី២ ហើយការបញ្ជូនបាល់ប្រកបដោយភាពឆ្លាតវៃរបស់គេ បានជួយឲ្យ De Bruyne ស៊ុតបាល់បញ្ចូលទីយ៉ាងល្អ ដើម្បីធ្វើឲ្យក្រុម Man City នាំមុខដ៏ស្តួចស្តើង។ បើទោះបីលោក Guardiola បានគប់ដបទឹកចោល ដើម្បីធ្វើការអបអរយ៉ាងរីករាយ ដែលបង្ហាញថា ការប្រកួតនេះពិតជាសំខាន់សម្រាប់លោកនោះ គ្រូបង្វឹករបស់ក្រុម Man City រូបនេះ ក៏ដឹងដែរថា ការប្រកួតវគ្គនេះ មិនទាន់ចប់នៅឡើយទេ។
Atletico បានទម្លាក់ក្រុម Manchester United ក្នុងវគ្គ១៦ក្រុមចុងក្រោយរួចជាស្រេច នៅរដូវកាលនេះ ស្របពេលដែល Liverpool ក៏ជួបការខកចិត្តក្រោមស្នាដៃក្រុមរបស់លោក Diego Simeone ផងដែរ នៅពេលដែលក្រុមហង្សក្រហមជាម្ចាស់ការពារពាន ក្នុងរដូវកាលឆ្នាំ២០១៩-២០២០។ ក្រុមជើងឯករបស់អេស្ប៉ាញមួយនេះ នឹងនៅតែជឿជាក់ថា ពួកគេអាចបង្កើតឲ្យមានការភ្ញាក់ផ្អើលមួយផ្សេងទឿតក្នុងជើងទី២ ក្នុងទីក្រុងម៉ាឌ្រីដ នាថ្ងៃទី១៣ ខែមេសា ខាងមុខនេះ៕
ប្រភពព័ត៌មាន៖ worldsoccertalk
