បរទេស៖ លោក Thomas Tuchel បាននិយាយថា Chelsea ចង់បង្ហាញពី «ភាពខ្លាំងរបស់ខ្លួន» ក្នុងការប្រកួតក្របខ័ណ្ឌ Champions League វគ្គ៨ក្រុមចុងក្រោយរបស់ខ្លួន ពេលប៉ះជាមួយនឹងក្រុម Real Madrid ខណៈដែលពួកគេសម្លឹងរកការស្តារមុខមាត់ត្រឡប់មកវិញ ពីការចាញ់ដ៏មិននឹកស្មានដល់ក្នុងលទ្ធផល ៤-១ ក្រោមស្នាដៃក្រុម Brentford កាលពីថ្ងៃសៅរ៍។
ពេលនេះ ពួកគេត្រៀមជួបជាមួយនឹងក្រុមយក្សរបស់អេស្ប៉ាញ ក្នុងរយៈពេល២ឆ្នាំជាប់ៗគ្នា ក្រោយពីឈ្នះការប្រកួតវគ្គពាក់កណ្តាលផ្តាច់ព្រ័ត្រ កាលពីឆ្នាំមុន ក្នុងលទ្ធផលទាំង២ជើង ៣-១ នៅមុនពេលផ្តួលក្រុម Manchester City ក្នុងវគ្គផ្តាច់ព្រ័ត្រ។ លោក Tuchel បានបញ្ជាក់ថា ក្រុមម្ចាស់ជើងឯក១៣សម័យកាល Real Madrid មិនមែនជាក្រុមខ្លាំងដូចពេលដែលពួកគេបានឈ្នះពានក្របខ័ណ្ឌ Champions League ៣រដូវកាល់ជាប់ៗគ្នា ចាប់ពីឆ្នាំ២០១៦ ដល់ឆ្នាំ២០១៨ ឡើយ ប៉ុន្តែ បាននិយាយថា ពួកគេនៅតែមានបទិសោធច្រើនក្នុងយុទ្ធនាការនេះ។
នៅមុនពេលការប្រកួតនៅរាត្រីនេះ លោកបានឲ្យដឹងថា៖ «ខ្ញុំគិតថា វាជារឿងធម្មតាដែលវដ្តន៍បែបនេះ មានផ្លាស់ប្តូរក្នុងពេលណាមួយ ហើយនេះគឺជាអ្វីដែលបានកើតឡើងលើពួកគេ។ សម្រាប់យើង វាជាឱកាសពិសេសក្នុងការប្រកួតជាមួយនឹង Real Madrid ក្នុងវគ្គ៨ក្រុមចុងក្រោយ។ យើងចង់បង្ហាញពីកម្រិតខ្លាំងរបស់យើងនៅថ្ងៃស្អែកនេះ។ យើងចង់បង្ហាញពីខ្លួនឯង ហើយនោះគឺជាគោលដៅ។ ឱកាសនេះពិតជាពិសេស»៕
ប្រភពព័ត៌មាន៖ AFP
