ក្រុមជម្រើសជាតិបាល់ទាត់កម្ពុជា អាយុក្រោម២៣ឆ្នាំ បានដឹងច្បាស់ហើយ ពីគូប្រកួត ដែលពួកគេ ត្រូវជួប សម្រាប់ការប្រកួតស៊ីហ្គេម លើកទី៣១ នៅប្រទេសវៀតណាម ឆ្នាំ២០២២នេះ ប៉ុន្តែចំពោះគម្រោងចេញទៅបោះជំរំហ្វឹកហាត់ នៅវៀតណាម សម្រាប់ត្រៀមការប្រកួតនេះ ហាក់ស្ថិតនៅក្នុងភាពមិនទាន់ច្បាស់លាស់ នៅឡើយទេ។
តាមរយៈការចាប់ឆ្នោត របស់គណៈកម្មាធិការរៀបចំ ការប្រកួតកីឡាស៊ីហ្គេម លើកទី៣១ ឆ្នាំ២០២២ នៅទីក្រុងហាណូយ កាលពីថ្ងៃពុធម្សិលមិញ គឺក្រុមទាំង១០ ដែលបានចូលរួមការប្រកួតនេះ ត្រូវបានចែកជា៥គ្រុប (Pot) ដោយក្នុងនោះគ្រុប១ មានក្រុមម្ចាស់ផ្ទះវៀតណាម និងថៃ គ្រុប២ មានឥណ្ឌូនេស៊ី និងម៉ាឡេស៊ី គ្រុប៣ មាន មីយ៉ាន់ម៉ា និងកម្ពុជា គ្រុប៤ មាន ហ្វីលីពីន និង សិង្ហបុរី ចំណែកគ្រុប៥ មាន ឡាវ និងទីម័រខាងកើត ហើយលក្ខខណ្ឌនៃការចាប់ឆ្នោតនេះ គឺកំណត់មិនឱ្យក្រុមស្ថិតនៅគ្រុបតែមួយ ឈរនៅពូលជាមួយគ្នានោះទេ។
ជាមួយគ្នានេះ ក្រុមម្ចាស់ផ្ទះ វៀតណាម ត្រូវបានដាក់ឱ្យឈរនៅពូលA ដោយស្វ័យប្រវត្តិ ហើយក្រុមថៃ ឈរនៅពូលB ចំណែកលទ្ធផល សម្រាប់ការចាប់ឆ្នោតរបស់ក្រុមផ្សេងទៀត គឺក្រុមឥណ្ឌូនេស៊ី មីយ៉ាន់ម៉ា ហ្វីលីពីន និងក្រុមទីម័រខាងកើត ឈរនៅពូលA ជាមួយម្ចាស់ជើងឯក វៀតណាម ខណៈម៉ាឡេស៊ី កម្ពុជា សិង្ហបុរី និងឡាវ ឈរនៅពូលB ជាមួយក្រុមថៃ។
តាមរយៈលទ្ធផល នៃការចាប់ឆ្នោតនេះ បានបង្ហាញឱ្យឃើញថា ក្រុមជម្រើសជាតិកម្ពុជា នឹងត្រូវធ្វើការងារធ្ងន់ ព្រោះត្រូវប្រឈមជាមួយក្រុមខ្លាំងៗដូចជាថៃ ម៉ាឡេស៊ី និងសិង្ហបុរី ខណៈក្រុមឡាវ ដែលកម្ពុជា ត្រូវជួបមុនគេ នៅថ្ងៃទី៩ ខែឧសភា នោះ ក៏មិនអាចមើលរំលងបានដូចគ្នា។
ទន្ទឹមនឹងនេះ សម្រាប់ញម្រោងចេញទៅបោះជំរំហ្វឹកហាត់របស់ក្រុមជម្រើសជាតិកម្ពុជា នៅប្រទេសវៀតណាមនោះ ក៏ស្ថិតនៅក្នុងភាពមិនទាន់ច្បាស់លាស់នោះដែរ ហេតុនេះការប្រកួតផ្តុំ អាចនឹងត្រូវធ្វើនៅក្នុងស្រុកសិន ដែលអាចនឹងចាប់ផ្តើម នៅថ្ងៃទី២៥ និងទី២៦ ខែមេសា ខាងមុខនេះ គឺបន្ទាប់ពីការប្រកួតលីគកំពូលកម្ពុជា ឈប់សម្រាក ក្រោយការប្រកួតចុងក្រោយ នៅថ្ងៃទី២៣ ខែមេសា។
ជុំវិញបញ្ហានេះ លោក ភា សុភ័ក្រ្តា គ្រូជំនួយក្រុមជម្រើសជាតិកម្ពុជា បានប្រាប់ថា៖ «សម្រាប់ការបោះជំរំហ្វឹកហាត់ (នៅប្រទេសវៀតណាម)នេះ យើងអត់ទាន់ច្បាស់ដែរ ដោយសារយើងនៅមិនទាន់ដឹងថា ខាងគណៈកម្មាធិការស៊ីហ្គេមនេះ គេឱ្យយើង ទៅមុនការប្រកួតប៉ុន្មានថ្ងៃនោះទេ»។
អតីតគ្រូបង្គោលក្រុមក្រសួងការពារជាតិ លោក ភា សុភ័ក្រ្តា បានបន្ថែមថា៖«ប៉ុន្តែសម្រាប់កម្មវិធី ដែលយើងត្រៀម គឺពេលលីគកំពូលកម្ពុជា ឈប់ពីថ្ងៃទី២៤ ខែមេសា ទៅ អ៊ីចឹង នៅថ្ងៃទី២៥ ឬទី២៦ យើងអាចប្រមូលផ្តុំ មួយដំណាក់កាល នៅក្នុងស្រុកខ្មែរសិន ហើយថ្ងៃចេញទៅហាណូយ អាចខ្ទង់ថ្ងៃទី២៨ ឬទី៣០ ខែមេសា»។
យ៉ាងណាមិញ សម្រាប់ការចាប់ឆ្នោតវិញ្ញាសាបាល់ទាត់នារី ដែលត្រូវបានធ្វើ កាលពីថ្ងៃពុធនោះដែរ ក្រុមម្ចាស់ជើងឯក វៀតណាម ត្រូវដាក់ឱ្យឈរនៅពូលA ដោយស្វ័យប្រវត្តិ ខណៈក្រុមលេខ២ ថៃ ឈរនៅពូលB ចំណែកក្រុមផ្សេងទៀត ត្រូវចាប់ឆ្នោតទៅតាមគ្រុប ហើយជាលទ្ធផល ក្រុមនារីកម្ពុជា ព្រមទាំងហ្វីលីពីន និងឥណ្ឌូនេស៊ី បានឈរនៅពូលA ជាមួយម្ចាស់ផ្ទះ វៀតណាម រីឯក្រុម មីយ៉ាន់ម៉ា ឡាវ និងសិង្ហបុរី ឈរនៅពូលB ជាមួយថៃ៕