បរទេស៖ កីឡាករ Christian Eriksen របស់ក្លឹប Brentford កំពុងសម្លឹងឃើញឪកាសវិលត្រលប់ ទៅកាន់ក្លឹបមាន់ខ្នាយមាស Tottenham Hotspur វិញនៅពេលបញ្ចប់រដូវកាលនេះ។
គួរបញ្ជាក់ថាកីឡាករអន្តរជាតិដាណឺម៉ាកបានវិលត្រលប់មកមានកាយសម្បទារឹងមាំឡើងវិញក្រោយជួបបញ្ហាគាំងបេះដូងនៅព្រឹត្តការណ៏ Euro ២០២០ ខណៈដែលរូបគេស៊ុតបញ្ចូលទី១គ្រាប់និងAssist២ដងនៅក្របខណ្ឌ Premier League ចំនួនប្រាំមួយប្រកួតមកដល់ពេលបច្ចុប្បន្ននេះ ។ Eriksen បច្ចុប្បន្នមានកុងត្រាជាមួយBrentford រហូតដល់ចុងបញ្ចប់នៃរដូវកាលនេះ ខណៈគ្រូបង្វឹករួមសញ្ជាតិលោក Thomas Frank ចង់អោយរូបគេចង់អោយកីឡាករវ័យ៣០ឆ្នាំរូបនេះបន្តលេងបានយូរបន្ថែមទៀត។
ទោះយ៉ាងណាប្រភពពីគេហទំព័រ Football Insider បានលើកឡើងថាៈ ខ្សែបម្រើអន្តរជាតិ ដាណឺម៉ាកកំពុងទទួលបានការ ចំណាប់អារម្មណ៍ពីសំណាក់អតីតក្លឹប Tottenham ស្របពេលសាម៉ីខ្លួនក៏មានបំណងចង់ចូលរួមជាមួយក្លឹបដែលមានមូលដ្ឋាននៅទីក្រុងឡុងដ៏ភាគខាងជើងផងដែរ។ Eriksen ធ្លាប់ចំណាយពេលជិត៧ ឆ្នាំកន្លះនៅ Tottenham ចន្លោះឆ្នាំ ២០១៣ ដល់ ២០២០ ដោយស៊ុតបញ្ចូលទីបាន ៦៩ គ្រាប់ និងបង្កើតឪកាសបញ្ចប់ទីបានរហូតដល់៩០ ដងឯណោះក្នុងការបង្ហាញខ្លួន៣០៥ ប្រកួតសម្រាប់ក្លឹប មុនពេលចាកចេញទៅ Inter Milan ក្រោមការដឹកនាំរបស់អតីតគ្រូបង្វឹកលោក Antonio Conte៕
ប្រភពព័ត៍មាន៖ Sportsmole
