បរទេស៖ ក្លិបបិសាចក្រហម Manchester United បានតែងតាំងលោក Erik ten Hag ដែលជាគ្រូបង្វឹករបស់ក្លិប Ajax Amsterdam ជាអ្នកចាត់ការទូទៅថ្មីរបស់ខ្លួន ដើម្បីជំនួសកន្លែងរបស់លោកគ្រូបង្វឹកបណ្តោះអាសន្ន Ralf Rangnick ចាប់ពីបញ្ចប់រដូវកាលនេះតទៅ។
នេះបើយោងទៅតាមការប្រកាសរបស់ក្លិបស្ថិតក្នុងក្របខ័ណ្ឌ Premier League មួយនេះកាលពីថ្ងៃព្រហស្បតិ៍។ ក្លិប Man United បានឲ្យដឹងក្នុងសេចក្តីថ្លែងការណ៍មួយថា៖ «ក្លិប Manchester United ពិតជារីករាយណាស់ក្នុងការប្រកាសពីការតែងតាំងលោក Erik ten Hag ជាអ្នកចាត់ការទូទៅថ្មីរបស់ក្រុមធំ ដោយលោកត្រូវតម្រូវឲ្យស្នើសុំវីសា មុននឹងចូលកាន់តំណែងចាប់ពីចុងរដូវកាលនេះតទៅ រហូតដល់ខែមិថុនា ឆ្នាំ២០២៥ ជាមួយនឹងជម្រើសក្នុងការបន្តកុងត្រារយៈពេល១ឆ្នាំទៀត»។
លោក Ten Hag គឺជាអ្នកចាត់ការទូទៅទី៥ ដែលត្រូវបានតែងតាំងដោយក្លិប Man United បើគិតចាប់តាំងពីលោក Alex Ferguson បានចូលនិវត្តន៍ ក្នុងឆ្នាំ២០១៣ បន្ទាប់ពីការតែងតាំងលោក David Moyes, Luis van Gaal, Jose Mourinho និងលោក Ole Gunnar Solskjaer។ លោក Rangnick បានចូលកាន់តំណែងជាអ្នកចាត់ការទូទៅបណ្តោះអាសន្នកាលពីខែវិច្ឆិកា ក្រោយពីការបណ្តេញលោក Solskjaer ចេញពីតំណែង ក្រោមកិច្ចព្រមព្រៀងគ្នាក្នុងការបន្តតំណែងជាទីប្រឹក្សា សម្រាប់រយៈពេល២ឆ្នាំ៕
ប្រភពព័ត៌មាន៖ Channel News Asia