បរទេស៖ លោក Erik ten Hag គ្រូបង្វឹកក្លឹបបិសាចក្រហម Man. United បានបញ្ជាឱ្យកីឡាកររបស់ក្លឹបទាំងអស់វិលត្រឡប់មកហ្វឹកហាត់មុនបើករដូវកាលយ៉ាងតិចពីរសប្តាហ៍ពោលគឺចាប់ផ្តើមមុនការគ្រោងទុករបស់ ក្លឹបគឺនៅថ្ងៃទី៤ខែកក្កដា២០២២ យោងតាមគេហទំព័រ The Mirror បានចុះផ្សាយ ។
បុរសសញ្ជាតិហូឡង់ដែលនឹងចាប់ផ្តើមចូលមកទទួលការងារជាផ្លូវការជាមួយក្លឹបនៅចុងបញ្ចប់នៃរដូវកាលនេះ ប៉ុន្តែរូបលោកបាននិង កំពុងរៀបចំផែនការសម្រាប់អាណត្តិក្រោយរបស់ខ្លួនឯងរួចជាស្រេចក្រោយពីទទួលបានការប្រកាសជាផ្លូវការណ៏។ គួរបញ្ជាក់ថាយុទ្ធនាការរដូវកាលនេះក្រុមម្ចាស់ជើងឯកអង់គ្លេស ២០ សម័យកាលធ្វើមិនបានល្អទេ និងជួបរឿងខកដោយបាត់បង់កៅអីChampion League ក្រោយចាញ់ Brighton ៤ទល់និង០ និងបច្ចុប្បន្ន ឈរនៅលេខរៀងទី៦ ក្នុងតារាង Premier League ខណៈក្លឹបត្រូវប្រជែងជាមួយក្រុមញញួរធំ West Ham ដើម្បីដណ្តើមកៅអីក្របខ័ណ្ឌ Europa League នៅរដូវកាលក្រោយ។
លោក Ten Hag ក៏និងត្រៀមរុះរើក្រុមឈុតធំ ខណៈដែលរូបលោកមានកញ្ចប់ថវិកាអនុម័ត្រប្រមាណ១០០លានផោនដើម្បីចំណាយលើ ការចុះហត្ថលេខាកីឡាករថ្មីស្របពេលក្លឹបក៏ចង់ស្វែងរកកីឡាករដែលអាចផ្ទេរមក Old Trafford ដោយគ្មានតម្លៃខ្លួន(Free Transfer) ផងដែរ។ សម្រាប់ក្រុម Ajax ដែលលោក Ten Hag ដឹកនាំបច្ចុប្បន្នបានប្រកួតត្រឹម ស្មើ ២ទល់និង២ ជាមួយ AZ កាលពីថ្ងៃអាទិត្យនោះ បច្ចុប្បន្នមាន ៤ ពិន្ទុដាច់ពីក្រុមលេខ ២ PSV Eindhoven នៅលើកំពូលតារាង Eredivisie ខណៈនៅសល់ពីរប្រកួតទៀតនិងត្រូវ បិទ បញ្ចប់រដូវកាល៕
ប្រភពព័ត៍មាន៖ Sportsmole