បរទេស៖ ក្លិប Real Madrid កំពុងតែស្ថិតយ៉ាងប្រកៀកក្នុងការចុះហត្ថលេខាជាមួយនឹង Antonio Rudiger ដោយគ្មានតម្លៃខ្លួន ក្រោយពីបានឈានដល់ការព្រមព្រៀងដោយផ្ទាល់មាត់ ជាមួយនឹងខ្សែការពាររបស់ក្លិប Chelsea រូបនេះ លើកិច្ចសន្យារយៈពេល៤ឆ្នាំ ក្នុងទំហំទឹកប្រាក់ដ៏ច្រើនសន្ធឹកសន្ធាប់។
Rudiger បានរៀបចំកិច្ចពិភាក្សាប្រកបដោយភាពវិជ្ជមានជាមួយនឹងថ្នាក់ដឹកនាំក្លិបមានមូលដ្ឋាននៅកីឡដ្ឋាន Bernabéu មួយនេះ កាលពីចុងសប្តាហ៍មុន ហើយនិងត្រូវទទួលបានចំណូលខ្ពស់ជាងមុន ក្រោយពីបានសម្រេចចិត្តចាកចេញពីក្លិប Chelsea នៅពេលដែលកិច្ចសន្យារបស់គេផុតកំណត់នៅចុងរដូវកាលនេះ។ លោក Carlo Ancelotti អ្នកចាត់ការទូទៅរបស់ក្រុម Real Madrid បានចាត់ទុកខ្សែការពារអន្តរជាតិអាល្លឺម៉ង់រូបនេះ ជាកីឡាករចំណូលថ្មីដ៏សំខាន់ម្នាក់ ហើយបើទោះបីការផ្ទេរនេះ មិនទាន់បំពេញជាផ្លូវការក៏ដោយ ប៉ុន្តេ គេគួរតែប្រកាសជាផ្លូវការក្នុងពេលឆាប់ៗនេះ។
កីឡាករវ័យ២៩ឆ្នាំរូបនេះ ត្រូវបានរំពឹងទុកថា នឹងទទួលបានចំណូលយ៉ាងហោចណាស់២០ម៉ឺនផោន (ស្មើនឹង២៥,៥ម៉ឺនដុល្លារអាមេរិក)។ ក្លិប Chelsea ធ្លាប់បានសង្ឃឹមថា អាចរក្សាទុក Rudiger ដែលទទួលបានចំណូលប្រមាណជា៩ម៉ឺនផោន ក្នុង១សប្តាហ៍ ប៉ុន្តែ មិនអាចឈានដល់កិច្ចព្រមព្រៀងជាមួយនឹងរូបគេ នៅមុនពេលការដាក់ទណ្ឌកម្ម លើលោក Roman Abramovich បានធ្វើឲ្យក្លិបនេះ មិនអាចផ្តល់កិច្ចសន្យាថ្មី តែម្តង៕
ប្រភពព័ត៌មាន៖ The Guardian