បរទេស៖ ប្រធានក្រុមបិសាចក្រហម Man. United កីឡាករ Harry Maguire អាចខកខានការប្រកួតដែលនៅសល់នៃយុទ្ធនាការរដូវកាលនេះ ដោយសារបញ្ហាជង្គង់។ខ្សែការពារកណ្តាលដែលត្រូវបានដាក់អោយអង្គុយកៅអីបម្រុងសម្រាប់ការប្រកួតក្របខណ្ឌ Premier League កាលពីចុងសប្តាហ៍មុនពេលចាញ់ម្ចាស់ផ្ទះ Arsenal បានបន្តអវត្តមានជាមួយ Chelsea សម្រាប់ការប្រកួតនៅយប់ថ្ងៃព្រហស្បតិ៍បន្តទៀត។
ថ្លែងក្នុងសន្និសីទសារព័ត៌មានមុនការប្រកួត គ្រូបង្វឹកបណ្ដោះអាសន្នសញ្ជាតិអាឡឺម៉ង់ លោក Ralf Rangnic បានលើកឡើងថា៖ «Maguire នឹងអវត្តមានពេលទទួលក្រុមលោកThomas Tuchel ដោយសារបញ្ហាជង្គង់»។ បើទោះបីជាលោក Rangnick បានពណ៌នារបួសមិនមែនជារឿងធំទេ ប៉ុន្តែយោងការចុះផ្សាយរបស់ Daily Mailបានបញ្ជាក់ថា កីឡាករអន្តរជាតិអង់គ្លេសរូបនេះនិងអវត្តមានពេញមួយរដូវកាល។
គួរបញ្ជាក់ថាកីឡាករអន្តរជាតិអង់គ្លេសវ័យ២៩ ឆ្នាំរូបនេះបានតស៊ូបង្ហាញទម្រង់លេងដ៏លំបាកនិងបានបង្កកំហុសមួយចំនួនបើទោះបីជាប្រកួតបានរហូតដល់ទៅ៣៥ដងនិងរកបាន២គ្រាប់ក៏ដោយ ។គ្រូបង្វឹកអចិន្រ្តៃយ៏ថ្មីលោក Erik ten Hag ត្រូវបានមើលឃើញថានិងអាចធ្វើការសម្រេចចិត្តបន្តរឺដក Maguire ធ្វើជាប្រធានក្រុម ស្របពេលម្ចាស់ជើងឯកអង់គ្លេស ២០ សម័យកាលកំពុងតែលំបាកក្នុងការប្រជែងតំណែង Top-4 ដោយការប្រកួត៤លើកចុងក្រោយជាមួយ Chelsea, Brentford, Brighton & Hove Albion និង Crystal Palace៕
ប្រភពព័ត៍មាន៖ Manchester United Official
