លោកនាយករដ្ឋមន្រ្តី ហ៊ុន សែន បានហាមផ្តាច់មិនឱ្យកីឡាករ កីឡាការិនីជម្រើសជាតិកម្ពុជា បង្កើតភាពអសោច ទៅលើការប្រើប្រាស់សារធាតុលើកកម្លាំង ដែលខុសពីបម្រាមរបស់កីឡា ជាដាច់ខាត សម្រាប់ការចូលរួមប្រកួតកីឡាស៊ីហ្គេម លើកទី៣១ នាទីក្រុងហាណូយ ប្រទេសវៀតណាម នាខែឧសភា ខាងមុខនេះ ព្រោះបញ្ហានេះ វាធ្វើឱ្យប៉ះពាល់ខ្លាំងដល់កិត្តិយសប្រទេសជាតិ។
ប្រមុខដឹកនាំប្រទេស លោក ហ៊ុន សែន បានថ្លែងថា៖ «ក្មួយៗជាកីឡាករ កីឡាការិនីត្រូវដឹងឱ្យបានច្បាស់ថា ការទៅប្រកួតស៊ីហ្គេមនេះ គឺកាន់ទង់ជាតិ នៃព្រះរាជាណាចក្រកម្ពុជា ទៅជាមួយ ដូច្នេះក្មួយៗ ត្រូវតែដឹងថា នៅជាប់នឹងខ្លួនក្មួយ មានតួអង្គព្រះមហាក្សត្រ មានតួអង្គ នីតិបញ្ញតិ រដ្ឋសភា ព្រឹទ្ធសភា មានតួអង្គនីតិប្រតិបត្តិ ជាពិសេសមានប្រជាជនជិត១៧លាននាក់ ដែលនៅជាមួយនឹងក្មួយៗ ហេតុនេះកិត្តិយស និងសេចក្តីថ្លៃថ្នូរ វាសំខាន់ណាស់ សម្រាប់ប្រទេសជាតិរបស់យើង ដូច្នេះអាសារធាតុគ្រឿងញៀននេះ គ្រឿងលើកកម្លាំងនេះ ត្រូវបានហាមកុំឱ្យមានដាច់ខាត»។
លោកនាយករដ្ឋមន្រ្តី បានបន្ថែមថា៖ «ការប្រកួតអាចមានការថ្លោះធ្លោយ ដោយអចេតនា ប៉ុន្តែសម្រាប់ការប្រើប្រាស់សារធាតុញៀន ឬសារធាតុលើកកម្លាំង ដែលខុសពីបម្រាមនេះ ជាចេតនាពិតប្រាកដ ដូច្នេះបើមានកំហុសនេះ វាជារឿងអសោច សម្រាប់មុខមាត់ប្រទេសជាតិរបស់យើង ហេតុនេះមិនត្រូវឱ្យមានរឿងនេះ កើតឡើងជាដាច់ខាត នៅក្នុងចំណោមកីឡារបស់យើង!»។
ការថ្លែងបែបនេះ របស់លោកនាយករដ្ឋមន្រ្តី ហ៊ុន សែន ត្រូវបានធ្វើឡើង ក្នុងពិធីសំណេះសំណាលជាមួយប្រតិភូកីឡាកម្ពុជា ចូលរួមប្រកួតកីឡាស៊ីហ្គេម លើកទី៣១ នាទីក្រុងហាណូយ ប្រទេសវៀតណាម នៅមណ្ឌលកោះពេជ្រ កាលពីព្រឹកថ្ងៃព្រហស្បតិ៍នេះ។
ជាមួយគ្នានេះ លោក ហ៊ុន សែន ក៏បានប្រាប់ឱ្យថ្នាក់ដឹកនាំកីឡា និងក្រុមជម្រើសជាតិកម្ពុជា ត្រូវរៀនសូត្រ និងដកស្រងយកបទពិសោធល្អៗ ពីការប្រកួត នៅស៊ីហ្គេមលើកនេះ ដើម្បីធ្វើជាទុន សម្រាប់រៀបចំការប្រកួតស៊ីហ្គេម លើកទី៣២ ឆ្នាំ២០២៣ ដែលកម្ពុជា នឹងត្រូវធ្វើម្ចាស់ផ្ទះ ជាប្រវត្តិសាស្រ្តលើកដំបូង ហើយស៊ីហ្គេមលើកនេះ វាជាលើកដំបូង ដែលកម្ពុជា បានបញ្ជូនក្រុមកីឡា ក្នុងកម្រិតទ្រង់ទ្រាយធំ ទៅចូលរួមប្រកួត។
លោកបានបញ្ជាក់ថា៖ «សម្រាប់ការប្រកួតស៊ីហ្គេម លើកនេះ សង្ឃឹមថា អ្នកដឹកនាំរបស់យើង ក៏ដូចជាកីឡាករ កីឡាការិនីរបស់យើង នឹងធ្វើការដកពិសោធ រៀនសូត្រ នៅទីនោះ ដើម្បីយើងចាត់ចែងធ្វើម្ចាស់ផ្ទះឱ្យបានសមស្រប។ ពិតមែនហើយ យើងបានសិក្សាជាលំដាប់ តៗគ្នារហូតមក ពីការចាត់ចែង និងរៀបចំធ្វើជាម្ចាស់ផ្ទះរបស់ប្រទេសគេ អ៊ីចឹងដល់យើងធ្វើម្ចាស់ផ្ទះ យើងក៏ត្រូវចាត់ចែង និងធ្វើយ៉ាងម៉េចឱ្យបានល្អដូចគេ ហើយបើបានល្អលើសគេទៀត ក៏កាន់តែល្អ»។
តាមរបាយការណ៍របស់លោក ថោន ខុន ប្រធានគណៈកម្មាធិការជាតិអូឡាំពិកកម្ពុជា (NOCC) បានឱ្យដឹងថា ការប្រកួតស៊ីហ្គេម នៅប្រទេសវៀតណាម លើកនេះ បានរៀបចំឱ្យមានការប្រកួតប្រជែង នៅលើប្រភេទកីឡាចំនួន៤០ ដោយមាន៥២៦វិញ្ញាសា ហើយប្រទេស ដែលត្រូវចូលរួមមានម្ចាស់ផ្ទះវៀតណាម កម្ពុជា ឡាវ ប្រ៊ុយណេ ឥណ្ឌូណេស៊ី ម៉ាឡេស៊ី សិង្ហបុរី ហ្វីលីពីន ថៃ មីយ៉ាន់ម៉ា និងទីម័រខាងកើត ដែលមានចំនួនកីឡាករ-កីឡាការិនី សរុប៧,១១៥នាក់ និងអ្នកស្ម័គ្រចិត្ត បម្រើការងាររៀបចំប្រកួត ចំនួន៣០០០នាក់។ ចំណែកកម្ពុជា នឹងប្រភេទកីឡា ចំនួន៣៣ ទៅចូលរួម ដោយក្នុងនោះ មានប្រតិភូកីឡាសរុបចំនួន៥៦០នាក់៕