បរទេស៖ លោក Pep Guardiola អ្នកចាត់ការទូទៅរបស់ក្រុម Manchester City បានចាត់ទុកការបរាជ័យនាពេលថ្មីៗនេះរបស់ក្រុមលោកក្នុងក្របខ័ណ្ឌ Champions League ជាការមិនអាចព្យាករបានក្នុងកីឡាបាល់ទាត់ ក្រោយពីក្រុម Real Madrid បានបង្កើតការវាយបកដ៏មិននឹកស្មានដល់នៅជិតបញ្ចប់ការប្រកួត ដើម្បីឈានទៅប្រកួតវគ្គផ្តាច់ព្រ័ត្រ។
Man City បាននាំមុខក្នុងលទ្ធផល ១-០ នៅរាត្រីប្រកួតនាកីឡដ្ឋាន Santiago Bernabeu និងនាំមុខទាំង២ជើង ៥-៣ មុននឹងឈានដល់នាទី ទី៩០ ខណៈដែលគ្រាប់បាល់បញ្ចូលទីពីរគ្រាប់ក្នុងចន្លោះពេលតែ៨៨វិនាទី ពីកីឡាករបម្រុង Rodrygo បានបង្ខំឲ្យការប្រកួតឈានដល់នាទីបន្ថែម១៥នាទី២ដង។
បន្ទាប់មកខ្សែប្រយុទ្ធ Karim Benzema បានរកគ្រាប់បាល់ឈ្នះ ពីការស៊ុតបាល់ប៉េណាល់ទី ដើម្បីជួយឲ្យក្រុមម្ចាស់ជើងឯក១៣សម័យកាលរបស់ពួកគេ ឈានទៅវគ្គផ្តាច់ព្រ័ត្រ ជាមួយនឹងក្រុម Liverpool នាថ្ងៃទី២៨ ខែឧសភា ក្នុងទីក្រុងប៉ារីស។ ក្រុមរបស់លោក Guardiola ត្រឹមតែអាចឈរសោកស្តាយចំពោះការខ្ជះខ្ជាយឱកាសជច្រើនទាំងក្នុងការប្រកួតជើងទី១នៅកីឡដ្ឋាន Etihad និងបន្ទាប់ពី Riyad Mahrez ជួយឲ្យពួកគេរកបានគ្រាប់បាល់នាំមុខនៅរយៈពេល១៧នាទីចុងក្រោយ។
លោក Guardiola បានប្រាប់ទូរទស្សន៍ BT Sport ថា៖ «យើងមិនបានលេងក្នុងកម្រិតដ៏ល្អបំផុតរបស់យើងឡើយ ប៉ុន្តែ វាជារឿងធម្មតា ដែលក្នុងវគ្គពាក់កណ្តាលផ្តាច់ព្រ័ត្រ កីឡាករមានអារម្មណ៍រងនូវសម្ពាធ។ បាល់ទាត់គឺមិនអាចព្យាករបានឡើយ។ វាជាការប្រកួតមួយបែបនេះឯង។ យើងត្រូវតែទទួលយកវា»៕
ប្រភពព័ត៌មាន៖ Channel News Asia