បរទេស៖ ក្រុម Manchester City ត្រូវតែបំភ្លេចការខកចិត្តផ្សេងៗ ក្នុងពេលប្រកួតជាមួយនឹងក្រុម Newcastle ក្នុងក្របខ័ណ្ឌ Premier League ក្រោយពីការធ្លាក់ចេញយ៉ាងឈឺចាប់ពីក្របខ័ណ្ឌ Champions League បើមិនអ៊ីចឹងទេ នឹងប្រឈមមុខនឹងការមិនស្គាល់ការឈ្នះពានសោះនៅរដូវកាលនេះ ស្របពេលដែល Liverpool កំពុងតែតាមពីក្រោយយ៉ាងប្រកៀក។
ក្រុមរបស់លោក Pep Guardiola ដែលកំពុងតែឈឺចាប់ ក្រោយពីបានខ្ជះខ្ជាយគ្រាប់បាល់នាំមុខនៅនាទីចុងក្រោយនៃការប្រកួតវគ្គពាក់កណ្តាលផ្តាច់ព្រ័ត្រ ជាមួយនឹងក្រុម Real Madrid មុននឹងចាញ់ទាំង២ជើងក្នុងលទ្ធផល ៦-៥ នោះ កំពុងតែនាំមុខ១ពិន្ទុលើក្រុមឈរលេខ២ Liverpool។ ប៉ុន្តែ ក្រុមមេឃខៀវមួយនេះ ត្រូវចាញ់ប្រៀមគូប្រកួតរបស់ខ្លួនបន្តិច ដោយសារតែត្រូវប្រកួតបន្ទាប់ពី Liverpool ប្រកួតរួចរាល់នៅចុងសប្តាហ៍នេះ។
Man City ដឹងយ៉ាងច្បាស់ពីការតព្វកិច្ចរបស់ខ្លួនសម្រាប់ការប្រកួតដែលនៅសល់ ពោលគឺត្រូវតែឈ្នះការប្រកួតទាំង៤លើកចុងក្រោយនៃក្របខ័ណ្ឌ Premier League ដើម្បីក្លាយជាម្ចាស់ជើងឯកជាលើកទី៤ ក្នុងរយៈពេល៥លើកចុងក្រោយ។ លោក Guardiola ពោរពេញដោយការជឿជាក់ថា ក្រុមរបស់លោកអាចបំភ្លេចសំណាងអាក្រក់របស់ពួកគេនៃការធ្លាក់ចេញពីក្របខ័ណ្ឌអឺរ៉ុប ប៉ុន្តែ លោកក៏ដឹងច្បាស់ផងដែរ ក្រុមរបស់លោកមិនអាចធ្វើឲ្យមានកំហុសទៀតឡើយ។ គ្រូបង្វឹករូបនេះបានឲ្យដឹងថា៖ «យើងត្រូវការពេលវេលានៅពេលនេះ ១ថ្ងៃ ឬ២ថ្ងៃ ប៉ុន្តែ យើងនឹងរះឡើងវិញ»៕
ប្រភពព័ត៌មាន៖ Channel news Asia
