បរទេស៖ ខ្សែប្រយុទ្ធ Erling Haaland កំពុងតែត្រៀមខ្លួនរួចរាល់ដើម្បីក្លាយជាកីឡាកររបស់ក្លិប Manchester City នៅសប្តាហ៍នេះ ក្រោយពីបានត្រួតពិនិត្យសុខភាពរួចរាល់ ហើយក្រុមម្ចាស់ជើងឯកក្របខ័ណ្ឌ Premier League បានប្រាប់ក្លិប Borussia Dortmund នឹងប្រើប្រាស់លក្ខខណ្ឌរំលាយកិច្ចសន្យារបស់កីឡាករវ័យ២១ឆ្នាំរូបនេះ។
តម្លៃខ្លួនសម្រាប់រំលាយកិច្ចសន្យាត្រូវបានគេដឹងថា មានចំនួនតិចជាង៧៥លានអឺរ៉ូ (ស្មើនឹង៧៩លានដុល្លារអាមេរិក) ដែលព័ត៌មានជាច្រើនបានចេញផ្សាយ។ ការផ្ទេរត្រូវបានរំពឹងទុកថា នឹងត្រូវប្រកាសជាផ្លូវការដោយក្លិប Dortmund របស់អាល្លឺម៉ង់ ក្នុងពេលឆាប់ៗនេះ ក្រោយពី Haaland បានបញ្ជាក់ប្រាប់សាម៉ីក្លិបរួចជាស្រេចអំពីបំណងរបស់គេ ក្នុងការចាកចេញ ក្រោយពីចំណាយពេលអស់២ឆ្នាំកន្លះ។ លក្ខខណ្ឌផ្ទាល់ខ្លួនរវាងកីឡាកររូបនេះ និងក្លិប Man City ក៏បានព្រមព្រៀងរួចរាល់ហើយដែរ។
Haaland នឹងទទួលបានប្រាក់បៀរវត្សរ៍ជាមូលដ្ឋានប្រមាណជា៣៥ម៉ឺនផោន (ស្មើនឹង៤៣ម៉ឺនដុល្លារអាមេរិក) ក្នុង១សប្តាហ៍ ហើយក៏អាចនឹងទទួលបានប្រាក់ឧបត្ថម្ភបន្ថែមផ្សេងទៀតផងដែរ ហើយរូបគេត្រៀមខ្លួនរួចរាល់ដើម្បីចុះកិច្ចសន្យារយៈពេល៥ឆ្នាំ។ សម្រាប់លោក Pep Guardiola អ្នកចាត់ការទូទៅរបស់ Man City ការផ្ទេរនេះ នឹងបញ្ចប់ការស្វែងរកអស់រយៈពេលដ៏យូរលើខ្សែប្រយុទ្ធដ៏ឆ្នើមម្នាក់ដើម្បីជំនួសកន្លែងរបស់ , Sergio Aguero។ Haaland គឺជាខ្សែប្រយុទ្ធដ៏ឆ្នើមម្នាក់ ក្រោយពីបានស៊ុតបាល់បញ្ចូលទី១៣៤គ្រាប់ ក្នុងការបង្ហាញខ្លួន១៨២លើក និងជួយឲ្យមិត្តរួមក្រុមរកបាន៣៦គ្រាប់ផ្សេងទៀត៕
ប្រភពព័ត៌មាន៖ The Guardian
