បរទេស៖ លោក Jurgen Klopp អ្នកចាត់ការទូទៅរបស់ក្រុម Liverpool បាននិយាយថា នៅតែមានការជឿជាក់ថា ក្រុមហងក្រហមរបស់លោក យកឈ្នះលើក្រុម Manchester City ដើម្បីលើកពានក្របខ័ណ្ឌ Premier League និងរក្សាក្តីសង្ឃឹមនៃការឈ្នះពាន៤ជាប្រវត្តិសាស្ត្រនៅរដូវកាលនេះ។
Man City បានបន្ថែមការនាំមុខរបស់ខ្លួន នៅលើកំពូលតារាង រហូតដល់ទៅ៣ពិន្ទុ ហើយក៏មានគ្រាប់បាល់ច្រើនជាងក្រុម Liverpool ចំនួន៤គ្រាប់ផងដែរ ក្រោយពីក្រុម Man City បានផ្តួលយកឈ្នះលើក្រុម Newcastle ក្នុងលទ្ធផល ៥-០ កាលពីថ្ងៃអាទិត្យ។ ប៉ុន្តែ រយៈពេល១ថ្ងៃមុននេះ ក្រុម Liverpool បានជួបការខកចិត្តនៅពេលដែលពួកគេបានបញ្ចប់ក្នុងលទ្ធផលស្មើ ១-១ ជាមួយនឹងក្រុម Tottenham។
ប៉ុន្តែ ទោះបីជាយ៉ាងណា លោក Klopp បានច្រានចោលការលើកឡើងនានាថា បច្ចុប្បន្ន លោកគួរតែផ្តោតលើការសន្សំកម្លាំងកីឡាកររបស់ខ្លួន សម្រាប់ការប៉ះជាមួយនឹងក្រុម Chelsea ក្នុងការប្រកួតពាន FA Cup វគ្គផ្តាច់ព្រ័ត្រ នៅថ្ងៃសៅរ៍ សប្តាហ៍នេះ និងការប្រកួតក្របខ័ណ្ឌ Champions League វគ្គផ្តាច់ព្រ័ត្រ ជាមួយនឹងក្រុម Real Madrid នាថ្ងៃទី២៨ ខែឧសភា។ ក្នុងសន្និសីទសារព័ត៌មាន មុនការប្រកួតជាមួយនឹងក្រុម Aston Villa នៅរាត្រីនេះ លោក Klopp បានឲ្យដឹងថា៖ «លុះត្រាតែយើងទៅលែងរួច ហេតុនេះ ហេតុអ្វីយើងគួរតែបំភ្លេចការជឿជាក់? នោះគឺជាចំណុចដែលយើងនឹងធ្វើ។ ពិតណាស់ វាមិនទាន់ចប់នៅឡើយទេ ពីព្រោះយើងទាំង២ នៅសល់ការប្រកួត៣លើកដូចគ្នា។ អ្វីដែលជាកង្វល់របស់ខ្ញុំនោះគឺថា តើយើងឈ្នះការប្រកួតទាំង៤លើកយ៉ាងម៉េច?»៕
ប្រភពព័ត៌មាន៖ Channel News Asia
