បរទេស៖ ក្រុមបាល់ទាត់ជម្រើសជាតិមីយ៉ាន់ម៉ា អាយុក្រោម២៣ឆ្នាំ បានផ្តួលក្រុមបាល់ទាត់ជម្រើសជាតិហ្វីលីពីន ក្នុងលទ្ធផល ៣-២ ក្នុងការប្រកួតក្នុងពូល A របស់ពួកគេនាកីឡដ្ឋាន Viet Tri ក្នុងខេត្ត Phu Tho ប្រទេសវៀតណាម កាលពីថ្ងៃអង្គារ ទី១០ ខែឧសភា ដើម្បីឈ្នះកៅអីទៅលេងក្នុងវគ្គពាក់កណ្តាលផ្តាច់ព្រ័ត្រនៃព្រឹត្តិការណ៍កីឡាស៊ីហ្គេម លើកទី៣១។
មីយ៉ាន់ម៉ា បានរកគ្រាប់បាល់បើកឆាកនៅនាទី ទី២ តាមរយៈខ្សែបម្រើ Win Naing Tun និងបានបន្តដាក់សម្ពាធលើគូប្រកួតរបស់ខ្លួនបន្ថែមទៀត មុននឹងរកបានគ្រាប់បាល់ទី២ នៅនាទី ទី២០ ប៉ុន្តែ ត្រូវបានលុបចោលវិញ ដោយសារតែជាបាល់ Offside។ ក្រោយពីការលេងស៊ីសង្វាក់គ្នាយ៉ាងល្អ និងភាពរឹងមាំផ្នែករាងកាយ បានជួយឲ្យក្រុមជម្រើសជាតិហ្វីលីពីន រកគ្រាប់បាល់តាមស្មើវិញ តាមរយៈកីឡាករ Beic Hervas នៅនាទី ទី៣៤។
ប៉ុន្តែ ២នាទីក្រោយមក ហ្វីពីលីពីន បានរកគ្រាប់បាល់នាំមុខវិញក្នុងលទ្ធផល ២-១ ពីបាល់ប៉េណាល់ទី ដោយសារតែការប្រព្រឹត្តិកំហុសរបស់មីយ៉ាន់ម៉ា។ ប៉ុន្តែ មីយ៉ាន់ម៉ា បានវាយបកដើម្បីផ្តួលក្រុមជម្រើសជាតិហ្វីលីពីន ក្នុងលទ្ធផល ៣-២ តាមរយៈគ្រាប់បាល់ទី២ និងទី៣របស់ពួកគេនៅនាទី ទី៥១ និងទី៥៣។ ក្រោយពីរកបាន៦ពិន្ទុពីការប្រកួត២លើក មីយ៉ាន់ម៉ា កំពុងតែស្ថិតក្នុងចំណាត់ថ្នាក់លេខ១ក្នុងពូល A ដើម្បីឈ្នះកៅអីទៅវគ្គពាក់កណ្តាលផ្តាច់ព្រ័ត្រ មុននឹងពួកគេត្រូវប៉ះម្ចាស់ផ្ទះវៀតណាម ក្នុងរយៈពេល២ថ្ងៃទៀត៕
ប្រភពព័ត៌មាន៖ seagames2021