ក្រុមបាល់ទាត់ជម្រើសជាតិកម្ពុជាអាយុក្រោម២៣ឆ្នាំ ដែលទើបបានបង្កើតការភ្ញាក់ផ្អើល តាមរយៈការយកឈ្នះក្រុមជម្រើសជាតិឡាវ ៤-១ កាលពីថ្ងៃចន្ទនោះ នឹងត្រូវធ្វើការប្រកួតជាមួយក្រុមជម្រើសជាតិសិង្ហបុរី នៅរសៀលម៉ោង៤ ថ្ងៃពុធនេះ ក្នុងព្រឹត្តិការណ៍ស៊ីហ្គេម នាទីក្រុងហាណូយ ចំណែកប្រតិភូកីឡា ចំនួន៣ប្រភេទទៀត ទើបតែទៅដល់ប្រទេសវៀតណាម កាលពីថ្ងៃអង្គារ ដើម្បីត្រៀមប្រកួត ទៅតាមជំនាញរបស់ពួកគេ។
សម្រាប់ការប្រកួតជម្រុះលើកទី២ ប្រចាំពូលB នៅថ្ងៃពុធនេះ អ្នកគាំទ្រកម្ពុជាភាគច្រើន មានការរំពឹងថា ក្រុមគោព្រៃជំទង់កម្ពុជា នឹងអាចបន្តដណ្តើមបាន៣ពិន្ទុ ជាបន្តទៀត ដើម្បីប្រជែងយកលេខ១ប្រចាំពូលនេះ ដែលកំពុងគ្រប់គ្រងដោយក្រុមជម្រើសជាតិថៃ ហើយកម្ពុជា ក៏ត្រូវប្រជែងដោយប្រយោលជាមួយក្រុមមានពិន្ទុ៣ដូចគ្នា គឺម៉ាឡេស៊ី ផងដែរ ព្រោះម៉ាឡេស៊ី ក៏ត្រូវជួបក្រុមឡាវ នៅយប់ថ្ងៃពុធនេះផងដែរ។
បើធ្វើការប្រៀបធៀបពីលទ្ធផល និងការប្រកួតជាក់ស្តែង ក្នុងព្រឹត្តិការណ៍ស៊ីហ្គេម នេះ ក្រុមកម្ពុជា អាចមានភាគរយខ្ពស់ជាងក្រុមសិង្ហបុរី ដោយហេតុថា កម្ពុជា បានយកឈ្នះក្រុមឡាវ ដល់ ៤-១ ប៉ុន្តែ សិង្ហបុរី បានត្រឹមស្មើ ២-២ ជាមួយក្រុមឡាវ តែប៉ុណ្ណោះ ហើយការចាញ់ក្រុមថៃ ៥-០ កាលពីថ្ងៃចន្ទ វាបានបន្ថែមសម្ពាធមួយទៀត សម្រាប់ក្រុមកំពុងឈរនៅបាតតារាងប្រចាំពូលB មួយនេះ គឺផ្ទុយពីកម្ពុជា ដែលកំពុងមានកម្លាំងចិត្តខ្លាំង ក្នុងការប្រកួតប្រជែង នៅថ្ងៃនេះ។
តែទោះបីជាយ៉ាងណា អ្នកចាត់ការទូទៅក្រុមជម្រើសជាតិកម្ពុជា លោក Keisuke Honda បានទម្លាយជាសាធារណៈថា ការប្រកួតប្រជែង នៅក្នុងព្រឹត្តិការណ៍នេះ វាមិនមែនជារឿងងាយស្រួលនោះទេ ហេតុនេះការផ្តោតអារម្មណ៍ ការលេងដោយមានទំនុកចិត្ត និងឆន្ទៈ ដ៏ពិតប្រាកដ គឺជាអ្វី ដែលក្រុមកម្ពុជា ត្រូវរក្សាឱ្យបាន ដើម្បីប្រកួតប្រជែង ក្នុងជំនួប លើកទី២នេះ។
«ការប្រកួតស៊ីហ្គេម គឺមិនងាយស្រួលនោះទេ»។ នេះជាសារស័ព្ទដ៏ខ្លី តែមានន័យជ្រៅ ដែលវីរបុរសបាល់ទាត់របស់ជប៉ុន លោក Keisuke Honda បានបង្ហោះនៅលើហ្វេសប៊ុករបស់ខ្លួន បន្ទាប់ពីកម្ពុជា បានយកឈ្នះក្រុមឡាវ ៤-១ កាលពីយប់ថ្ងៃចន្ទ ហើយជាមួយគ្នានេះ Honda ក៏បានត្អូញត្អែរ ពីកម្មវិធីប្រកួតដ៏មមាញឹក នៅស៊ីហ្គេម នេះផងដែរ ដោយលោកបានឱ្យអ្នកគាំទ្រកម្ពុជា ធ្វើការទស្សន៍ទាយផងដែរថា តើ កម្ពុជា នឹងប្រើប្រព័ន្ធលេង បែបណា ចំពោះការជួបក្រុមសិង្ហបុរី ថ្ងៃនេះ។
យ៉ាងណាក៏ដោយ ទាំងលោក Keisuke Honda និងគ្រូបង្គោលជនជាតិជប៉ុន លោក Ryu Hirose បានដាក់គោលដៅរួចទៅហើយថា នឹងព្យាយាមដឹកនាំ ឱ្យក្រុមគោព្រៃជំទង់កម្ពុជា អាចឡើងទៅកាន់វគ្គពាក់កណ្តាលផ្តាច់ព្រ័ត្រ ជាថ្មីម្តងទៀត ហើយនេះជាអ្វីដែលគ្រូបង្វឹកជប៉ុនទាំង២នេះ បានធ្វើការបង្វឹកក្រុមកម្ពុជា ទាំងយប់ នៅក្រោយការយកឈ្នះក្រុមឡាវ កាលពីយប់ថ្ងៃចន្ទនោះ ព្រោះពួកគាត់ ចង់រៀបចំឱ្យបានរួចរាល់ សម្រាប់ការជួបក្រុមសិង្ហបុរី នៅថ្ងៃពុធនេះ៕
