គ្រូបង្គោលជនជាតិជប៉ុន លោក Ryu Hirose បានបង្ហាញជាសាធារណៈថា ការទំនាក់ទងលេងរបស់ក្រុមជម្រើសជាតិកម្ពុជាអាយុក្រោម២៣ឆ្នាំ គឺមិនល្អទេ ហើយការបញ្ចប់ទីរបស់ក្រុមនេះ ក៏មិនច្បាស់នោះដែរ ហើយនេះជាមូលហេតុ ដែលធ្វើឱ្យពួកគេ បានចាញ់ក្រុមសិង្ហបុរី ១-០ ដ៏ក្រៀមក្រំ កាលពីយប់មិញ។
គ្រូបង្វឹកក្រុមជម្រើសជាតិកម្ពុជា លោក Ryu Hirose បានថ្លែង ក្នុងសន្និសីទកាសែត ក្រោយការប្រកួតថា៖ «នេះ ជាការប្រកួតដ៏លំបាកមួយ ដោយយើងបានខកខានឱកាសល្អៗជាច្រើន ហើយត្រូវទទួលបានលទ្ធផលដ៏ក្រៀមក្រំ។ ជាមួយគ្នានេះ ទំនាក់ទំនងគ្នារវាងកីឡាករ គឺមិនល្អ ហើយនេះជាមូលហេតុធ្វើឱ្យការទាត់បញ្ចូលទីមិនសូវល្អ រីឯការបញ្ចូនបាល់ ក៏មិនល្អដូចគ្នា ហេតុនេះ យើងនឹងធ្វើការកែតម្រូវ»។
សម្រាប់ការប្រកួត កាលពីថ្ងៃពុធម្សិលមិញនេះ ក្រុមកម្ពុជា បានធ្វើការវាយលុក ទៅលើក្រុមសិង្ហបុរី ភ្លាមៗ ព្រោះពួកគេចង់រកគ្រាប់បាល់ឱ្យបានលឿន ដូចដែលបានយកឈ្នះក្រុមឡាវ ៤-១ កាលពីថ្ងៃចន្ទ ហើយនៅក្នុងនោះខ្សែប្រយុទ្ធជាប្រធានក្រុម សៀង ចន្ធា បានបង្កើតមាសមុនគេ ដោយរូបគេ បានអូសបាល់រំលងការពារទាំង៣នាក់របស់សិង្ហបុរី យ៉ាងល្អបំផុត ប៉ុន្តែ ចន្ទា មិនអាចឆ្កឹះបាល់យ៉ាងកៀកនោះ ផុតពីការចេញមកសង្រ្គោះរបស់អ្នកចាំទីក្រុមសិង្ហបុរី Zaiful បាននោះទេ។
ជាមួយគ្នានេះ តាមរយៈការវាយលុកជាបន្តបន្ទាប់នោះ កម្ពុជា បានបង្កើតឱកាសជាច្រើនទៀត ប៉ុន្តែពួកគេ នៅតែមិនអាចរកបានគ្រាប់បាល់ ហើយអ្វីដែលគួរឱ្យស្តាយបំផុតនោះ គឺការស៊ុតទៅប៉ះបង្គោលរបស់ ញាណ សុស៊ីដាន ព្រមទាំងការតែតទៅប៉ះបង្គោលទីរបស់ ជួន ចាន់ចាវ និងការស៊ុតទៅប៉ះបង្គោលទីរបស់ខ្សែប្រយុទ្ធ គី រីណា ហើយការគ្មានសំណាងនេះ បានធ្វើឱ្យកម្ពុជា ចាញ់ក្រុមសិង្ហបុរី ១-០ យ៉ាងក្រៀមក្រំ ដែលគ្រាប់បាល់ជ័យជម្នះនេះ បានកើតមានឡើង តាំងពីនាទីទី២៦ តាមរយៈការតែតបញ្ចូលទីរបស់ខ្សែប្រយុទ្ធពាក់លេខ១០ Saifullanh។
ទន្ទឹងនឹងនេះ លោក Ryu Hirose ក៏បានទទួលស្គាល់ថា កម្ពុជា គ្មានសំណាង ក្នុងការរកបានគ្រាប់បាល់ ផងដែរ។ គ្រូបង្វឹកជនជាតិជប៉ុនរូបនេះ បានបញ្ជាក់ថា៖ «យើងមិនមានសំណាង ក្នុងការបញ្ចប់ទី ដែលបញ្ហា វាបានធ្វើឱ្យប៉ះពាល់ដល់អារម្មណ៍របស់កីឡាករ ហើយខ្ញុំសង្ឃឹមថា កីឡាករនឹងមានភាពចាស់ទុំជាងមុន»។
ដោយឡែក លោក Nazri Nasir គ្រូបង្វឹកក្រុមសិង្ហបុរី ក៏បានទទួលស្គាល់ថា ក្រុមរបស់លោក មានសំណាងជាងក្រុមកម្ពុជា ផងដែរ ចំពោះជ័យជម្នះ ១-០ នេះ។ លោកបាននិយាយថា៖ «យើងមិនចុះចាញ់ទេ យើងរាងមានសំណាងបន្តិច។ យើងបានផ្តោតអារម្មណ៍រយៈពេល ៩០នាទី ធ្វើតាមបច្ចេកទេស គឺយើងរៀនលេងឱ្យបានកាន់តែល្អ និងឆ្លៀតបង្កើតបានឱកាសល្អៗ ហេតុនេះយើងស័ក្តិសមនឹងឈ្នះ»៕
