បរទេស៖ ក្រុមហង្សក្រហម Liverpool នឹងខិតខំព្យាយាមរក្សាក្តីសង្ឃឹមនៃការប្រជែងដណ្តើមពាន៤ នៅក្នុងការប្រកួត FA Cup វគ្គផ្តា់ចព្រ័ត្រនៅថ្ងៃសៅរ៍ ជាមួយនឹងក្រុម Chelsea ដែលសង្ឃឹមថា នឹងស្វាគមន៍ម្ចាស់កម្មសិទ្ធិថ្មីលោក Todd Boehly តាមរយៈការដណ្តើមបានជ័យជម្នះនៅកីឡដ្ឋាន Wembley។
ក្រុមរបស់លោក Jurgen Klopp នៅសល់ការប្រកួត៤លើកទៀត ក្នុងការប្រជែងរបស់ពួកគេ ដើម្បីក្លាយជាក្រុមអង់គ្លេសដំបូងគេក្នុងការឈ្នះរាល់ពានធំៗទាំង៤ ក្នុងរដូវកាលតែមួយ។ ពួកគេបានផ្តួលក្រុម Chelsea ដើម្បីលើកពាន League Cup កាលពីខែកុម្ភៈ និងបានឈានទៅប្រកួតវគ្គផ្តាច់ព្រ័ត្រនៃពាន FA Cup និងក្របខ័ណ្ឌ Champions League ដោយពួកគេនឹងត្រូវប៉ះ Real Madrid នៅថ្ងៃទី២៨ ខែឧសភា។ មិនមានក្លិបអង់គ្លេសណាមួយ បានស្ថិតយ៉ាងប្រកៀក ក្នុងការឆ្ពោះទៅកាន់ការឈ្នះពាន៤បែបនេះឡើយ ប៉ុន្តែ Liverpool ដឹងថា ក្តីសង្ឃឹមនៃការឈ្នះពាន Premier League កំពុងតែស្ថិតក្នុងភាពស្តួចស្តើង។
ការប្រកួតនៅថ្ងៃសៅរ៍នេះ គឺជាការជួបគ្នាម្តងទៀតជាមួយនឹងក្រុម Chelsea ដែលធ្វើបានយ៉ាងល្អក្នុងការប្រកួតដណ្តើមពាន League Cup វគ្គផ្តាច់ព្រ័ត្រ យ៉ាងស្វិតស្វាញ កាលពីខែកុម្ភៈ នៅមុនពេលក្រុម Liverpool បានទទួលជ័យជម្នះដោយការស៊ុតបាល់ប៉េណាល់ទីក្នុងលទ្ធផល ១១-១០ ក្រោយពីបញ្ចប់ក្នុងលទ្ធផលស្មើ ០-០ នៅម៉ោងធម្មតា។ Liverpool និង Chelsea គឺជាក្រុមអង់គ្លេសដំបូងគេ ដែលជួបគ្នាក្នុងការប្រកួតវគ្គផ្តាច់ព្រ័ត្រនៃពានក្នុងស្រុកទាំង២លើក បើគិតចាប់តាំងពីក្រុម Arsenal និង Sheffield Wednesday ធ្វើបានកាលពីឆ្នាំ១៩៩៣៕
ប្រភពព័ត៌មាន៖ Channel News Asia
