បរទេស៖ ក្រុមបាល់ទាត់ជម្រើសជាតិវៀតណាមអាយុក្រោម២៣ឆ្នាំ បានកត់ត្រាជ័យជម្នះក្នុងលទ្ធផល ២-០ លើក្រុមជម្រើសជាតិទីម័រ ក្នុងការប្រកួតចុងក្រោយនៃពូល A របស់ពួកគេ នាកីឡដ្ឋាន Viet Tri ក្នុងខេត្ត Phu Tho កាលពីថ្ងៃអាទិត្យ ទី១៥ ខែឧសភា កន្លងទៅ ដើម្បីកក់កៅអីរបស់ពួកគេក្នុងវគ្គពាក់កណ្តាលផ្តាច់ព្រ័ត្រ ក្នុងព្រឹត្តិការណ៍កីឡាស៊ីហ្គេម លើកទី៣១។
ក្នុងការប្រកួតនេះ លោកគ្រូបង្វឹក Park Hang-seo បានផ្តល់ឱកាសដល់កីឡាករវ័យក្មេងជាច្រើន ដូចជាខ្សែការពារកណ្តាល Duy Cuong ខ្សែបម្រើ Trong Long និង Cong Den រួមជាមួយនឹងខ្សែប្រយុទ្ធ Thanh Minh និង Van Tung ស្របពេលដែលកីឡាករសំខាន់ៗជាច្រើន ស្ថិតជាកីឡាករបម្រុង។ បើទោះបីគ្រប់គ្រងការប្រកួតនេះក៏ដោយ ប៉ុន្តែ វៀតណាម បានជួបការលំបាកក្នុងការរកគ្រាប់បាល់បញ្ចូលទីនៅតង់ទី១ ដែលបានបញ្ចប់ក្នុងលទ្ធផលស្មើ ០-០។
ក្នុងតង់ទី២ កីឡាករ Le Van Xuan បានបញ្ជូនបាល់ទៅឲ្យ Van Tung ដើម្បីរកគ្រាប់បាល់បើកឆាកសម្រាប់វៀតណាម នៅនាទី ទី៥២ នៅមុនពេល Ho Thanh Minh បានតែតបាល់បញ្ចូលទីយ៉ាងល្អ ក្នុងរយៈពេល១១នាទីក្រោយមក ដើម្បីជួយឲ្យវៀតណាម ទទួលជ័យជម្នះក្នុងលទ្ធផល ២-០។ វៀតណាម បញ្ចប់ការប្រកួតពូល A ដោយនាំមុខលើកំពូលតារាង មាន១០ពិន្ទុ ហើយឥណ្ឌូនេស៊ី ស្ថិតក្នុងចំណាត់ថ្នាក់លេខ២ ក្រោយពីផ្តួលក្រុមមីយ៉ាន់ម៉ា ក្នុងលទ្ធផល ៣-១។ ការប្រកួតវគ្គពាក់ពាក់កណ្តាលផ្តាច់ព្រ័ត្រ នឹងប្រព្រឹត្តទៅនៅថ្ងៃទី១៩ ខែឧសភា ខាងមុខនេះ៕
ប្រភពព័ត៌មាន៖ seagame2021