បរទេស៖ ក្រុមបាល់ទះលើក្តារជម្រើសជាតិកម្ពុជា បានឈានទៅវគ្គពាក់កណ្តាលផ្តាច់ព្រ័ត្រនៃព្រឹត្តិការណ៍កីឡាស៊ីហ្គេមជាលើកដំបូង បើគិតចាប់តាំងពីឆ្នាំ១៩៨៣ ក្រោយពីក្រុមជម្រើសជាតិថៃ បានយកឈ្នះលើក្រុមហ្វីលីពីន ក្នុងការប្រកួតពូល B កាលពីថ្ងៃចន្ទ ទី១៦ ខែឧសភា។
ក្រុមកម្ពុជា មានភាពច្បាស់លាស់ក្នុងការទៅវគ្គបន្តនេះ ដោយសារតែក្រុមម្ចាស់ជើងឯក៨សម័យកាលថៃ បានយកឈ្នះលើម្ចាស់មេដាយប្រាក់ ហ្វីលីពីន ក្នុងលទ្ធផល ៣សិត ទល់នឹង ០ (២៥-២០, ២៩-២៧ និង ២៥-២២) ដើម្បីទម្លាក់ហ្វីលីពីន ចេញពីក្នុងពូល ដែលមានតែ៣ក្រុម។ កម្ពុជា បានធ្វើឲ្យខ្លួនឯងស្ថិតលើផ្លូវឆ្ពោះទៅកាន់ការប្រកួតវគ្គពាក់កណ្តាលផ្តាច់ព្រ័ត្រ នាព្រឹត្តិការណ៍កីឡាស៊ីហ្គេមជាលើកដំបូង ក្នុងរយៈពេល៣៩ឆ្នាំ ក្រោយពីបានយកឈ្នះលើក្រុមជម្រើសជាតិហ្វីលីពីន ក្នុងលទ្ធផល ៣សិត ទល់នឹង១ កាលពីថ្ងៃសៅរ៍ ទី១៤ ខែឧសភា។
ហេតុនេះ ជ័យជម្នះកាលពីថ្ងៃចន្ទរបស់គូប្រកួតខ្លួន មានន័យថា ក្រុមជម្រើសជាតិកម្ពុជា និងថៃ នឹងត្រូវប៉ះគ្នានៅថ្ងៃពុធ ទី១៨ ខែឧសភា ដើម្បីកាត់សេចក្តីក្រុមដែលត្រូវបញ្ចប់ក្នុងចំណាត់ថ្នាក់លេខ១ និងលេខ២ ក្នុងពូល B។ លទ្ធផលកាលពីថ្ងៃចន្ទ ក៏បានជួយឲ្យថៃ បំពេញការសងសឹករបស់ខ្លួនលើហ្វីលីពីន ផងដែរ ក្រោយពីចាញ់ក្រុមហ្វីលីពីន ៣-២ ក្នុងការប្រកួតស៊ីហ្គេម កាលពីឆ្នាំ២០១៩៕