បរទេស៖ Chelsea កំពុងតាមដានយ៉ាងយកចិត្តទុកដាក់លើការវិវឌ្ឃទៅមុខជាមួយអនាគតរបស់ខ្សែប្រយុទ្ធឆ្នើម Bayern Munich កីឡាករ Robert Lewandowski ។
កាលពីថ្ងៃសៅរ៍ខ្សែប្រយុទ្ធ ជើងចាស់ដ៏មានបទពិសោធន៏រូបនេះបានបញ្ជាក់ថារូបលោកចង់ចាកចេញពីសង្វៀន Allianz Arena នៅរដូវក្តៅនេះដោយបង្ហើបថាគាត់មិនមានចេតនាក្នុងការបន្តកុងត្រាថ្មីនោះទេ។ ស្របពេលដែលប្រមុខដឹកនាំក្លឹបយក្សអាឡឺម៉ង់បានច្រានចោលឱកាសចាកចេញរបស់កីឡាករវ័យ ៣៣ ឆ្នាំរូបនេះ ថាតើ ពួកគេអាចរកបេក្ខភាពកីឡាករមក ជំនួសប្រធានក្រុមជម្រើសជាតិប៉ូឡូញរូបនេះបានដែរឬទេ?។ Barcelona គឺជាក្លឹបដែលមានទំនាក់ទំនងចង់ផ្ទេរយក Lewandowski ដោយត្រៀមផ្តល់កិច្ចសន្យារយៈពេលបីឆ្នាំ ប្រសិនភាគីទំាងសងខាងឈាន ដល់ការយល់ព្រមគ្នានោះ។
ផ្ទុយទៅវិញយោងការចុះផ្សាយរបស់កាសែត The Guardian បានឱ្យដឹងថា Chelsea នឹងត្រៀមចូលមកប្រជែងយក Lewandowski ប្រសិន Barcelona មិនអាចឆ្លើយតបនឹងកិច្ចព្រមព្រៀងក៏ដូចជាតម្លៃដែល Bayern Munich ស្នើរសុំ។ មួយវិញទៀតក្លឹបដែលទើបតែមានកៅអីទៅលេងនៅក្របខណ្ឌ Champion League ត្រូវតែចែកផ្លូវជាមួយ Romelu Lukaku ឬ Timo Werner ប្រសិនចង់បានLewandowski មករួមក្រុម។ បច្ចុប្បន្នការផ្ទេរម្ចាស់កម្មសិទ្ធិគ្រប់គ្រងក្លឹបដែលមានមូលដ្ឋាននៅភាគខាងលិចទីក្រុងឡុងដ៏ នៅតែត្រូវឆ្លងកាត់ឱ្យបានឆាប់តាមដែលអាចធ្វើទៅបាន ដើម្បីបញ្ចៀសបម្រាម ក៏ ដូច ជា ដំណើរក្លឹបអោយបានល្អប្រសើរជាងពេលកន្លងទៅក្រោមការគ្រប់គ្រងរបស់ប្រធានក្លឹបលោកRoman Abramovich៕
ប្រភពព័ត៍មាន៖ Sportsmole