ក្រុមជម្រើសជាតិកីឡាវ៉ូវីណាមកម្ពុជា បានបង្ហាញឱ្យយ៉ាងច្បាស់ថា ពួកគេ នៅតែមានសមត្ថភាពគ្រប់គ្រាន់ ក្នុងការដណ្តើមបានទាំងមេដាយមាស ប្រាក់ និងសំរឹទ្ធ ជូនប្រទេសជាតិ បើបើពីជាប្រភេទកីឡានេះ មិនត្រូវបានដាក់ឱ្យចូលរួម ក្នុងព្រឹត្តិការណ៍ស៊ីហ្គេម ចំនួន៣លើក កន្លងមកក៏។
តាមកំណត់ត្រាដ៏ជោគជ័យរបស់ក្រុមជម្រើសជាតិវ៉ូវីណាមកម្ពុជា គឺពួកគេ ដណ្តើមបានមេដាយមាស២ ប្រាក់១ និងសំរឹទ្ធ៧ សម្រាប់ការបង្ហាញខ្លួន ជាលើកដំបូង ក្នុងការប្រកួតស៊ីហ្គេម នៅមីយ៉ាន់ម៉ា កាលពីឆ្នាំ២០១៣ ប៉ុន្តែសម្រាប់ស៊ីហ្គេម នៅសិង្ហបុរី កាលឆ្នាំ២០១៥ ស៊ីហ្គេម កាលឆ្នាំ២០១៧ នៅម៉ាឡេស៊ី និងស៊ីហ្គេម កាលពីឆ្នាំ២០១៩ នៅហ្វីលីពីន គឺប្រភេទកីឡាវ៉ូវីណាម មិនត្រូវបានដាក់ឱ្យចូលរួមប្រកួតនោះទេ។
តែទោះបីជាយ៉ាងណា សម្រាប់ការប្រកួតស៊ីហ្គេម លើកទី៣១ ឆ្នាំ២០២១ ដែលកំពុងធ្វើ នៅទីក្រុងហាណូយ ប្រទេសវៀតណាម គឺក្រុមវ៉ូវីណាមកម្ពុជា នៅតែអាចបង្កើតបានភាពខ្លាំង ខណៈពួកគេ អាចដណ្តើមបានមេដាយមាស១ ប្រាក់១ និងសំរឹទ្ធ សម្រាប់ការប្រកួតប្រជែងថ្ងៃទី១របស់ពួកគេ កាលពីថ្ងៃពុធ។
តាមរយៈការប្រកួតសម្តែងជាក្រុម (នារី១ បុរស៣ មានអាវុធ) កាលពីម្សិលមិញនេះ កីឡាការិនី ប៉ាល់ ឆរស្មី រួមទាំងកីឡាករ លី បូរ៉ាមី, ជ្រិន ប៊ុនឡុង និង ប្រាក់ សុវណ្ណនី បានបង្ហាញបច្ចេកទេសសម្តែង បានយ៉ាងល្អ និងទទួលបានមេដាយមាស ដោយពួកគេ ធ្វើបានពិន្ទុសរុបខ្ពស់ជាងគេ គឺ២៦៩ ខណៈក្រុមម្ចាស់ផ្ទះវៀតណាម ធ្វើបាន ២៦៤ពិន្ទុ ឥណ្ឌូនេស៊ី បាន២៥៧ពិន្ទុ ឡាវ បាន២៥៤ពិន្ទុ មីយ៉ាន់ម៉ា បាន២៥២ពិន្ទុ និងក្រុមថៃ បានត្រឹម២៥១ពិន្ទុ ដែលឈរនៅលេខ៦ ក្រោយគេ។
សម្រាប់ការឈ្នះមេដាយមាស នៅថ្ងៃបើកឆាកនេះ វាបានបង្ហាញឱ្យឃើញថា ក្រុមវ៉ូវីណាមកម្ពុជា នៅតែមានសមត្ថភាពខ្ពស់ជាងគេ ក្នុងការប្រកួតសម្តែងជាក្រុមនេះ ព្រោះការប្រកួតស៊ីហ្គេម ឆ្នាំ២០១៣ កីឡាការិនី ប៉ាល់ ឆរស្មី ,លី បូរ៉ាមី, ប្រាក់ សុវណ្ណនី និងកីឡាករ សាន សុជាតិ ក៏បានរួមគ្នា ដើម្បីឈ្នះបានមេដាយមាស លើវិញ្ញាសានេះដូចគ្នា។
ជាមួយគ្នានេះ កីឡាការិនី សុខ សុភី សុភី ដែលបានយកឈ្នះលើកីឡាការិនីរបស់ហ្វីលីពីន ដោយពិន្ទុ ៧-៦ នៅវគ្គពាក់កណ្តាលផ្តាច់ព្រ័ត្រនោះ អាចដណ្តើមបានត្រឹមមេដាយប្រាក់ នៅក្នុងប្រកួតទម្ងន់៥៥គីឡូក្រាម របស់នាងផងដែរ បន្ទាប់ពីកីឡាការិនីរបស់កម្ពុជារូបនេះ បានចាញ់កីឡាការិនីរបស់ម្ចាស់ផ្ទះវៀតណាម ដោយពិន្ទុដាច់ ១០-០ នៅវគ្គផ្តាច់ព្រ័ត្រនោះ។
ចំណែកកីឡាការិនី ប៉ាល់ ឆរស្មី និងកីឡាការិនី ពៅ សុខា ដែលប្រកួតលើវិញ្ញាសា សម្តែងការពារខ្លួនអាវុធ នោះ បានទទួលត្រឹមមេដាយសំរឹទ្ធ ហើយនៅថ្ងៃព្រហស្បតិ៍នេះ ក្រុមអត្តពលិកវ៉ូវីណាមកម្ពុជា នឹងធ្វើការប្រកួត នៅលើប្រភេទវិញ្ញាសាជាច្រើនទៀត ដើម្បីបន្តស្វែងរកមេដាយជូនកម្ពុជាបន្ថែមទៀត៕
