ក្រុមជម្រើសជាតិប៉េតង់កម្ពុជា បានប្រើការប្រកួតថ្ងៃចុងក្រោយ របស់ពួកគេ នៅស៊ីហ្គេម ប្រទេសវៀតណាម កាលពីម្សិលមិញ ក្នុងការដណ្តើមបានមេដាយមាស១ និងមេដាយប្រាក់ចំនួន១ ដើម្បីក្លាយជាប្រភេទកីឡា ដែលកំពុងឈានមុខគេ ក្នុងការដណ្តើមបានមេដាយមាសជូនកម្ពុជា។
តាមរយៈការប្រកួត កាលពីថ្ងៃព្រហស្បតិ៍ ម្សិលមិញ សម្រាប់វិញ្ញាសាប្រកួតជាក្រុម (៣នាក់ទល់៣នាក់) គឺក្រុមប៉េតង់កម្ពុជា ទាំងផ្នែកបុរស និងនារី សុទ្ធតែបានទទួលជ័យជម្នះ នៅក្នុងការប្រកួតវគ្គពាក់កណ្តាលផ្តាច់ព្រ័ត្រ ដោយក្នុងនោះ ក្រុមនារី បានយកឈ្នះក្រុមឡាវ ១៣-១០ រីឯក្រុមបុរស បានទម្លាក់ក្រុមម៉ាឡេស៊ី ដើម្បីឡើងទៅវគ្គផ្តាច់ព្រ័ត្រ ទាំង២ក្រុម។
យ៉ាងណាមិញ សម្រាប់ការប្រកួតផ្តាច់ព្រ័ត្រជាមួយក្រុមនារីវៀតណាម កីឡាការិនី អ៊ុន ស្រីយ៉ា, ស៊្រាង សុរ៉ាឃីម, ឃួន យ៉ារី និងកីឡាការិនី ដួង ឌីណា (បម្រុង១នាក់) អាចសហការគ្នាលេង បានធ្វើយ៉ាងល្អ។ បើទោះបីជាពួកគេ ធ្លាប់ចាញ់ក្រុមម្ចាស់ផ្ទះនេះ ១៣-៨ ក្នុងវគ្គជម្រុះក្នុងពូល ប៉ុន្តែ អ៊ុន ស្រីយ៉ា, ឃួន យ៉ារី និងកីឡាការិនី ដួង ឌីណា បែរជាអាចកែប្រែស្ថានភាព ពីការចាញ់ប្រៀប ៧-៥ ទៅជាឈ្នះ ដោយលទ្ធផលផ្លូវការ ១៣-១១ ដើម្បីឈ្នះបានមេដាយមាស យ៉ាងរំភើបបំផុត ហើយនេះក៏ជាការការពារតំណែងលេខ១របស់ពួកគេ បានសម្រេច សម្រាប់ការឈ្នះមេដាយមាស លើវិញ្ញាសានេះ កាលស៊ីហ្គេម ឆ្នាំ២០១៩ ផងដែរ។
ផ្ទុយពីនេះ កីឡាករកម្ពុជា ញ៉ែម បូរ៉ា, ហេង ថន, សៀង វណ្ណា, ឃួន លីហ៊រ (បម្រុងម្នាក់) បានប្រកួតចាញ់ក្រុមថៃ ជាមួយពិន្ទុរហូតដល់ ១៣-១ នៅវគ្គផ្តាច់ព្រ័ត្រ បើទោះបីជាក្រុមថៃនេះ ពួកគេ ធ្លាប់ឈ្នះ ១៣-៤ នៅវគ្គជម្រុះវិលជុំក៏ដោយ ហើយលទ្ធផលនេះ បានធ្វើឱ្យពួកគេ ទទួលបានមេដាយប្រាក់។
យ៉ាងណាក៏ដោយ ការបញ្ចប់បេសកកម្ម ជាមួយការឈ្នះមេដាយមាសសរុបចំនួន២ ប្រាក់២ និងសំរឹទ្ធ៣ នៅក្នុងការប្រកួតស៊ីហ្គេម លើកនេះ បានក្លាយជាលទ្ធផលដ៏ល្អបំផុត សម្រាប់ក្រុមប៉េតង់កម្ពុជា ព្រោះការស៊ីហ្គេម ចុងក្រោយ នៅហ្វីលីពីន ឆ្នាំ២០១៩ ពួកគេ ដណ្តើមបានត្រឹមមេដាយមាស១ និងប្រាក់១ទេ។
បន្ថែមលើនេះ ការឈ្នះបានមេដាយមាស២ ប្រាក់២ និងសំរឹទ្ធចំនួន៣នេះ បានបង្ហាញថា ក្រុមប៉េតង់កម្ពុជា បានកំពុងនាំមុខគេ ក្នុងការឈ្នះបានមេដាយមាសច្រើនជាងគេ ឱ្យកម្ពុជា ព្រោះគិតត្រឹមពេលនេះ ក្រុមចំបាប់ តេក្វាន់ដូ (WT) វ៉ូវីណាម និងប្រដាល់ឃីកបុកស៊ីង ដណ្តើមជូនកម្ពុជា ត្រឹមម្នាក់១ប៉ុណ្ណោះ ដែលធ្វើឱ្យកម្ពុជា ពេលនេះ ឈ្នះបានមេដាយមាស ៦ ប្រាក់៩ និងសំរឹទ្ធ២៥៕