ក្រុមជម្រើសជាតិចំបាប់កម្ពុជា បានបញ្ចប់ការប្រកួតស៊ីហ្គេម លើកទី៣១ ឆ្នាំ២០២១ នៅទីក្រុងហាណូយ ប្រទេសវៀតណាម កាលពីម្សិលមិញ ហើយក៏ជាពេល ដែលពួកគេ ដណ្តើមបានមេដាយមាស១ ប្រាក់១ និងសំរឹទ្ធសរុបចំនួន៤ ជូនដល់ប្រទេសកម្ពុជា សម្រាប់ការបំពេញបេសកកម្ម លើកនេះផងដែរ។
សម្រាប់មេដាយមាស១ ដែលអត្តពលិកជម្រើសជាតិកម្ពុជាចំបាប់ ដណ្តើមបាននេះ គឺរកបានដោយ កីឡាករកូនកាត់ខ្មែរ-អ៊ីរ៉ង់ ស៊ូ បាលី បន្ទាប់ពីកីឡាករចំបាប់សេរី ទម្ងន់១២៥គីឡូក្រាម រូបនេះ បានយកឈ្នះលើកីឡាកររបស់វៀតណាម ដោយពិន្ទុដាច់ ១០-០ និងបានបន្តឈ្នះកីឡាករឡាវ ដោយពិន្ទុដាច់ ១០-០ ដូចគ្នា នៅក្នុងការប្រកួតជម្រុះវិលជុំ ទាំង២លើករបស់ខ្លួននោះ។
ចំណែកមេដាយប្រាក់ រកបានដោយកីឡាករកូនកាត់ខ្មែរ-អ៊ីរ៉ង់ ម៉ូ សារី ក្នុងការប្រកួតក្នុងទម្ងន់៩៧គីឡូក្រាម។ ម៉ូ សារី បានចាញ់កីឡាករវៀតណាម នៅវគ្គជម្រុះដំបូង ប៉ុន្តែគេបានយកឈ្នះកីឡាកររបស់ហ្វីលីពីន ដោយពិន្ទុ ១០-០ ទើបដណ្តើមបានមេដាយប្រាក់នេះ។ រីឯកីឡាការិនី ឌិត សំណាង កីឡាការិនី ជា កញ្ញា កីឡាករ សឿន សុភាស់ និង ហេង វុទ្ធី ដណ្តើមបានមេដាយសំរឹទ្ធ ទៅតាមប្រភេទទម្ងន់រៀងៗ ប៉ុន្តែកីឡាករ ឌន សៅ, កែវ សុភ័ក្រ្ត, អេង សេងលាង, ងួន មករា, យុន ប៊ុនណា, ជុន ធួន, អុល សៅហ៊ាង ព្រមទាំងកីឡាការិនី សឿន នឿន និង សម្បត្តិ វណ្ណៈ មិនដណ្តើមបានមេដាយទេ។
បើទោះបីជាការឈ្នះបានមេដាយមាស១ ប្រាក់១ និងសំរឹទ្ធ៤ នេះ វាមានចំនួនតិច បើប្រៀបធៀបទៅនឹងការប្រកួតស៊ីហ្គេម ឆ្នាំ២០១៣ ដែលក្រុមចំបាប់ ដណ្តើមបានមេដាយមាសដល់៤ ប្រាក់២ និងសំរឹទ្ធចំនួន៤ ប៉ុន្តែ លោក Casey Barnett អនុប្រធានសហព័ន្ធកីឡាចំបាប់កម្ពុជា បានកើតសរសើរពីការប្រឹងប្រែងទៅដល់ក្រុមអត្តពលិកទាំងនេះ ដែលបានតស៊ូ ហ្វឹកហាត់ និងជម្នះការលំបាកជាច្រើន ទម្រាំអាចដណ្តើមបានមេដាយទាំង៣ប្រភេទជូនជាតិ នៅពេលនេះ។
ប្រធានប្រតិភូដឹកនាំក្រុមជម្រើសជាតិកម្ពុជា លោក Casey Barnett បានថ្លែងក្រោយការប្រកួត បានបញ្ចប់ កាលពីថ្ងៃល្ងាចម្សិលមិញនោះថា៖ «តាមរយៈការប្រកួតចំនួន៣យើងដណ្តើមបានមេដាយមាស១ ប្រាក់១ និងសំរឹទ្ធ៤ គឺជាលទ្ធផលនេះ ដែលសប្បាយរីករាយ និងទទួលយក»។
នាយកវិទ្យាស្ថានខេមអេដ រូបនេះ បានបន្ថែមថា៖ «ការឈ្នះបានមេដាយ នៅពេលនេះ វាកើតចេញពីការខិតខំប្រឹងប្រែងតស៊ូរបស់ក្រុមអត្តពលិកយើង ដោយពួកគេ បានហ្វឹកហាត់នៅក្នុងរបត់កូវីដ១៩ គឺការបិទខ្ទប់ហ្វឹកហាត់ នៅពហុកីឡដ្ឋានជាតិមរតកតេជោ ដែលមិនបានជួបជុំគ្រួសារ ប្រពន្ធ កូន នោះទេ គឺពួកគាត់បានទ្រាំតស៊ូ និងជម្នះរាល់ការលំបាក ដើម្បីដណ្តើមយកមេដាយជូនដល់ប្រទេសជាតិ ហេតុនេះខ្ញុំពិតជាកោតសរសើរ និងមានការរីករាយណាស់ សម្រាប់លទ្ធផល ការឈ្នះមេដាយ នៅពេលនេះ»៕