បរទេស៖ លោក Steve McClaren និង Mitchell van der Gaag ត្រូវបានតែងតាំងជាជំនួយការគ្រូបង្វឹកអចិន្រ្តៃយ៏ថ្មីលោក Erik ten Hag ដោយក្លឹបបិសាចក្រហម Man. United នៅថ្ងៃច័ន្ទដើមសប្តាហ៏នេះ។
ការពិតបុរសទាំងពីររូបនេះគឺធ្លាប់ធ្វើការងាររួមគ្នាជាមួយ លោក Ten Hag ដោយលោក McClarenធ្លាប់ធ្វើការនៅក្លឹប FC Twente និងលោក Van der Gaag នៅ Ajax ដែលជាក្រុមនៅលីកកំពូលហូឡង់។ ជាមួយគ្នានេះផងដែរកាលពីថ្ងៃអាទិត្យបុរសទាំងបីររូបក៏ទើបតែបានបង្ហាញវត្តមានក្នុងហ្វូងអ្នកគាំទ្រក្រុម Man. Utdខណៈដែលពួកគេបានបរាជ័យក្រោមថ្វី ជើងម្ចាស់ផ្ទះ Crystal Palace នៅថ្ងៃចុងក្រោយនៃនៃការបិទបញ្ចប់រដូវកាល Premier League កាលពីថ្ងៃអាទិត្យ។
អតីតជំនួយការលោកSir Alex Ferguson ចន្លោះឆ្នាំ១៩៩៩-២០០១ និង ធ្លាប់ដឹកនាំក្រុមតោកំណាចជម្រើសជាតិអង់គ្លេសលោក McClaren បានលើកឡើងថា៖ «ខ្ញុំគិតថាការខិតខំ ប្រឹងប្រែងធ្វើការរបស់ខ្ញុំទើបខ្ញុំបានជួប Erik ។កម្លាំងដ៏អស្ចារ្យរបស់គាត់មិនគ្រាន់តែផ្តោតលើព័ត៌មានលម្អិត និងការរៀបចំប៉ុណ្ណោះទេ គាត់មានទស្សនវិជ្ជាច្បាស់លាស់អំពីរបៀបដែលគាត់ចង់ដឹកនាំលេងបាល់ទាត់ និងបរិយាកាសដែលគាត់ចង់បង្កើត»៕
ប្រភពព័ត៍មាន៖ Sportsmole
