បរទេស៖ អ្នកគាំទ្រជាច្រើនពាន់នាក់ បានតម្រៀបជួរគ្នានៅតាមដងវិថីនានា នៅពេលដែលក្រុម Liverpool បានវិលត្រឡប់ទៅផ្ទះវិញ ជាមួយនឹងក្បួនដង្ហែររថយន្តក្រុងគ្មានដំបូល កាលពីថ្ងៃអាទិត្យ ដែលបានកើតឡើង ស្របពេលដែលមានការរំជួលចិត្តផ្ទុយគ្នា។
ការឈ្នះទាំងពាន League Cup និង FA Cup ក្នុងរដូវកាលតែមួយ ក្រោយពីក្រុម Liverpool បានយកឈ្នះលើក្រុម Chelsea ដោយការស៊ុតបាល់ប៉េណាល់ទី ក្នុងការប្រកួតវគ្គផ្តាច់ព្រ័ត្រ នាកីឡដ្ឋាន Wembley ទាំង២លើក គឺជាហេតុផលដែលសមនឹងទទួលបានការអបអរសម្រាប់ក្លិបភាគច្រើន។ ប៉ុន្តែ ពាន២ដែលពួកគេចង់បាន ពោលគឺពានក្របខ័ណ្ឌ Premier League និង Champions League បែរជារបូតចេញពីដៃរបស់ពួកគេ ដ៏គួរឲ្យសោកស្តាយទៅវិញ។
ខ្សែបម្រើស្លាប Vinicius Junior បានស៊ុតបាល់បញ្ចូលទីកាត់សេចក្តីក្នុងការប្រកួត ខណៈដែលក្រុម Real Madrid បានផ្តួលក្រុម Liverpool ក្នុងលទ្ធផល ១-០ ក្នុងការប្រកួតក្របខ័ណ្ឌ Champions League វគ្គផ្តាច់ព្រ័ត្រ កាលពីថ្ងៃសៅរ៍ ក្នុងទីក្រុងប៉ារីស ដើម្បីក្លាយជាស្តេចប្រចាំទ្វីបអឺរ៉ុប ជាលើកទី១៤។ ការប្រកួតនេះ ក៏ត្រូវបានរំខានដោយសារតែបញ្ហានានានៅខាងក្រៅទីលានប្រកួតផងដែរ ដែលនាំឲ្យមានការពន្យារពេលការប្រកួតរហូតដល់ទៅកន្លះម៉ោង។ លោក Jurgen Klopp គ្រូបង្វឹកនៃក្រុម Liverpool បានឲ្យដឹងថា៖ «កីឡាករបានលេងយ៉ាងល្អនៅរដូវកាលនេះ។ យុទ្ធនាការ២ដែលយើងមិនអាចឈ្នះ យើងបានខកខានតែបន្តិចប៉ុណ្ណោះ»៕
ប្រភពព័ត៌មាន៖ Channel News Asia
