បរទេស៖ ខ្សែប្រយុទ្ធ Darwin Nunez នឹងត្រូវធ្វើដំណើរទៅកាន់ប្រទេសអង់គ្លេស នៅថ្ងៃចន្ទនេះ ដើម្បីពិនិត្យសុខភាព ក្រោយពីក្រុម Liverpool បានឈានដល់ការព្រមព្រៀងលើតម្លៃខ្លួន១០០លានអឺរ៉ូ (ស្មើនឹង១០៥លានដុល្លារអាមេរិក) ជាមួយនឹងក្លិប Benfica ដើម្បីនាំយកតារាឆ្នើមអន្តរជាតិអ៊ុយរូហ្គាយរូបនេះ។
Liverpool នឹងត្រូវបង់ប្រាក់លើតម្លៃខ្លួនជាគោលចំនួន៨០លានអឺរ៉ូ និងប្រាក់ឧបត្ថម្ភចំនួន២០លានអឺរ៉ូបន្ថែមទៀត។ Nunez បានស្ថិតក្នុងទីក្រុង Almeria កាលពីថ្ងៃអាទិត្យ ដែលជាកន្លែងរូបគេបានលេង នៅមុនពេលចូលរួមជាមួយនឹងក្លិប Benfica ហើយនឹងត្រូវធ្វើដំណើរពីប្រទេសអេស្ប៉ាញ ទៅកាន់ប្រទេសអង់គ្លេស។ កីឡាករអន្តរជាតិអ៊ុយរូហ្គាយវ័យ២២ឆ្នាំរូបនេះ បានយល់ព្រមលើកិច្ចសន្យារយៈពេល៦ឆ្នាំ និងបើបូករួមទាំងប្រាក់ឧបត្ថម្ភនានាទៀត រូបគេទំនងក្លាយជាកីឡាករដែលមានតម្លៃខ្លួនខ្ពស់ជាងគេបំផុតក្នុងប្រវត្តិសាស្ត្ររបស់ Liverpool ក្រោយពីតម្លៃខ្លួនរបស់គេគឺខ្ពស់ជាងតម្លៃខ្លួន៧៥លានផោន ដែល Liverpool បានចំណាយទិញខ្សែការពារ Virgil van Dijk ពីក្លិប Southampton កាលពីខែមករា ឆ្នាំ២០១៨។
Nunez គឺជាអ្នករកបានគ្រាប់បាល់ច្រើនជាងគេ ក្នុងក្របខ័ណ្ឌកំពូលរបស់ព័រទុយហ្គាល់ ក្នុងរដូវកាលឆ្នាំ២០២១-២០២២ ក្រោយពីរកបាន២៦គ្រាប់ និងបានស៊ុតបាល់បញ្ចូលទី៣៤គ្រាប់ ក្នុងរាល់យុទ្ធនាការទាំងអស់។ រូបគេក៏បានស៊ុតបាល់បញ្ចូលទីផងដែរ ក្នុងការប្រកួតក្របខ័ណ្ឌ Champions League វគ្គ៨ក្រុមចុងក្រោយ ទាំង២ជើង របស់ Benfica ជាមួយនឹងក្រុម Liverpool កាលពីខែមេសា ហើយរូបគេក៏ទទួលបានការកោតសរសើរពីលោក Jurgen Klopp ផងដែរ៕
ប្រភពព័ត៌មាន៖ The Guardian